ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑައިރެކްޓަރުގެ އިތުރުން ގައުމީ ފުޓްބޯޅަ ޓީމުގެ ކޯޗުގެ މަގާމަށް ހަންގޭރީގެ އިސްޓަވާން އުރުބާނީ ހަމަޖައްސައިފިއެވެ.

މިއީ ރާއްޖޭގެ ކޯޗުކަމާ އޭނާ ހަވާލުވާ ތިންވަނަ ފަހަރެވެ.

އުރުބާނީ، ގައުމީ ފުޓްބޯޅަ ޓީމުގެ ކޯޗުގެ މަގާމަށާއި، އެފްއޭއެމްގެ ޓެކްނިކަލް ޑައިރެކްޓަރުގެ މަގާމަށް އައްޔަންކުރުމަށް ނިންމީ މިއަދު ބޭއްވި އެ އެސޯސިއޭޝަންގެ އެކްސްކޯ ބައްދަލުވުމުގައެވެ.

މީގެކުރީން، 2009 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގައި ވެސް ރާއްޖޭގެ ފުޓްބޯޅަ ޓީމަށް އޭނާ އިރުޝާދު ދީފައިވާއިރު، އެ ފަހަރުގެ މުބާރާތުގައި ރާއްޖޭން ރިހި މެޑެލް ހާސިލްކުރިއެވެ.

އޭގެފަހުން 2012 ވަނަ އަހަރު ލަންކާގައި ކުރިއަށްދިޔަ މަހިންދަ ރާޖަޕަކްސަ ފުޓްބޯޅަ މުބާރާތް ރާއްޖޭގެ 23 އަހަރުން ދަށުގެ ޓީމަށް ކާމިޔާބުކޮށްދިނީ ވެސް އުރުބާނީ އެވެ. އެއީ، ރާއްޖޭގެ 23 އަހަރުން ދަށުގެ ފުޓްބޯޅަ ޓީމަކުން ބައިނަލްއަގުވާމީ މުބާރާތެއްގައި އެންމެ ފުރަތަމަ ހޯދީ ކާމިޔާބީއެވެ.

އުރުބާނީގެ ކޯޗިންގ ކެރިއަރުގައި ވަނީ، ހަންގޭރީގެ ފުރަތަމަ ޑިވިޝަނުގެ އިތުރުން އެމެރިކާގެ މޭޖާ ލީގު ސޮކާގެ ސްޕޯޓިންގ ކެންސަސް ސިޓީ އަށް އިރުޝާދު ދީފައެވެ.