ޕާކިސްތާނުގެ ދެކުނު ހުޅަނގު ސަރަޙައްދުގައި ހުރި އަންހެން ކުދިންގެ ސްކޫލެއްގެ ކައިރީގައި ހިނގި ބޮން ގޮއްވުމެއްގައި މަދުވެގެން 14 މީހުން މަރުވެ، 23 މީހުންނަށް އަނިޔާވެއްޖެއެވެ.

މީގެ ތެރޭގައި ފަސް ސްކޫލް ކުދިން ހިމެނެއެވެ.

ހުކުރު ދުވަހު ހިނގި މި ހަމަލާ އަމާޒުކޮށްފައިވަނީ ބަލޫޗިސްތާން ޕްރޮވިންސްގެ މަސްތުން ރަށުގައި ޕޯލިއޯ ވެކްސިން ޖެހުމުގެ މަސައްކަތް ބަލަހައްޓަމުން ދިޔަ ފުލުހުންނަށެވެ.

ސީނިއަރ ސުޕްރިންޓެންޑެންޓް އޮފް ޕޮލިސް ރަޙްމަތުﷲ ރޮއިޓަރސް ނިއުސް އޭޖެންސީއަށް ވިދާޅުވި ގޮތުގައި މި ހަމަލާގެ އަމާޒަކަށްވީ ޕޯލިއޯ ވެކްސިން ޖަހާ ޓީމެއް ގެންދަން ދިޔަ ފުލުހުންގެ ވެހިކަލަކަށެވެ.

އަލްޖަޒީރާގައި ރިޕޯޓުކޮށްފައިވާ މަޢުލޫމާތުތަކަށް ބަލާއިރު، ފަސް ކުދިންނާއި، ފުލުހުންގެ އޮފިސަރަކާއި، މަގުމަތިން ދިޔަ މީހަކު ވަނީ ގޮއްވުމާއެކު މަރުވެފައެވެ. އަދި ދެ ފިރިހެނުން ވަނީ ހޮސްޕިޓަލުގައި ފަރުވާދެމުން ދަނިކޮށް ނިޔާވެފައެވެ.

މި ގޮއްވުން ހިނގާފައިވަނީ ސްކޫލް ކައިރީގައި ޕާކުކޮށްފައި ހުރި މޮޓޯ ސައިކަލަކަށް ހަރުކޮށްފައިވާ އިމްޕްރޮވައިޒްޑް އެކްސްޕްލޯސިވް ޑިވައިސްއަކުން ކަމަށް ބެލެވެއެވެ. މި ހަމަލާގެ ޒިންމާ އަދި އެއްވެސް ފަރާތަކުން ނަގާފައެއް ނުވެއެވެ.

މި ހަމަލާގެ ޒިންމާ އަދި އެއްވެސް ފަރާތަކުން ނަގާފައެއް ނުވެނެވެ. އަދި ސަރުކާރުން ވަނީ މި ހަމަލާ ގަދަ އަޑުން ކުށްވެރިކޮށް، ޒިންމާވާ ފަރާތްތައް ހޯދައި ޢަދުލުގެ ކުރިމައްޗަށް ގެނައުމަށް އަޒުމު ކަނޑައަޅާފައެވެ.