ދިވެހިރާއްޖޭގައި މާލީ ހޭލުންތެރިކަން އިތުރުކުރުމުގެ ޕްރޮގްރާމެއް ހިންގުމަށް، ބީއެމްއެލް (ބޭންކް އޮފް މޯލްޑިވްސް) އިން ދުނިޔޭގެ އެންމެ އިސް ސަފުގައި ހިމެނޭ ވިސާއާ އެކު ސްޓްރެޓީޖިކް ޕާޓްނާޝިޕެއް ޤާއިމްކޮށްފިއެވެ.

މި ޕްރޮގްރާމަކީ ބީއެމްއެލްއާއި ތައުލީމީ ވުޒާރާ ގުޅިގެން، މާލީ ހޭލުންތެރިކަން އިތުރުކުރުމަށް ފެށި ޕްރޮގްރާމެކެވެ. އަދި މި ޕްރޮގްރާމުގެ ދަށުން ޒުވާނުންނާއި، ކުދި އަދި މެދުފަންތީގެ ވިޔަފާރިތަކާ، ތައުލީމީ އިދާރާތަކާއި އެކިއެކި މުޖުތަމައުތަކުގައި މާލީ ހޭލުންތެރިކަން އިތުރުކުރުމަށް މުހިންމު މަސައްކަތްތަކެއް ކުރެވިގެންދާނެއެވެ.

ބީއެމްއެލްއިން މިކަމާ ގުޅިގެން ނެރުނު ބަޔާނެއްގައި މި އެއްބަސްވުމުގެ ދަށުން ވިސާގެ ފައިނޭންޝަލް ލިޓްރަސީ ޕްރޮގްރާމްގެ "ޕްރެކްޓިކަލް މަނީ ސްކިލްސް'" އަދި "ޕްރެކްޓިކަލް ބިޒްނަސް ސްކިލްސް'" ސެޝަންތައް ރާއްޖޭގައި ހިންގާނެކަމަށް ބުނެފައިވެއެވެ.

މި ސެޝަންތަކުގައި ފައިދާހުރި ކަންތައްތަކެއް ދަސްކޮށްދޭނެކަން ފާހަގަކޮށް، ބަޖެޓްކުރުމާއި ފައިސާ ފަހަށް ރައްކާކުރުމުގެ މުހިންމުކަމާއި، ދަރަނި ހެޔޮގޮތުގައި މެނޭޖްކުރާނެ ގޮތްތައް ކިޔައިދޭނެކަމަށް ބީއެމްއެލް އިން ވަނީ ބުނެފައެވެ. މީގެއިތުރުން ފައިސާ ރަނގަޅުގޮތުގައި ބޭނުންކުރާނެ ގޮތް ކިޔައިދީ، ކުދި އަދި މެދުފަންތީގެ ވިޔަފާރިތައް ހިންގާ ފަރާތްތަކަށް ފައިސާ ގެންގުޅޭނެ ގޮތުގެ އިރުޝާދުތައް ހިއްސާކުރެވިގެންދާނެއެވެ. އަދި ކޭޝް ފްލޯ ބަލަހައްޓާނެގޮތާ، އަގު ކަނޑައެޅުމާއި ޑިޖިޓަލް ޕޭމަންޓް އަދި ކަސްޓަމަރުން އިތުރުކުރާނެ ގޮތްތަކާއި ވިޔަފާރީގެ އުކުޅުތަކުގެ މައުލޫމާތު ވެސް ފޯރުކޮށްދެވޭނެއެވެ.

މި ޕްރޮގްރާމް އިފްތިތާހުކޮށް، އެއްބަސްވުމުގައި ސޮއިކުރެއްވީ ވިސާއިން ރާއްޖެއާއި ސްރީލަންކާއަށް ކަނޑައަޅުއްވާފައި ހުންނަވާ ކަންޓްރީ މެނޭޖަރ އަވަންތި ކޮލަމްބަގެ އާއި ބޭންކުގެ ސީއީއޯ އެންޑް މެނޭޖިންގ ޑިރެކްޓަރ މުޙައްމަދު ޝަރީފްއެވެ.