ހުޅުމާލޭގައި ފުލުހެއްގެ ގައިގައި ސައިކަލުން ޖައްސައި، ފިލަން އުޅުނު ޒުވާނަކު ހައްޔަރުކޮށްފިއެވެ.

ފުލުހުން ވިދާޅުވި ގޮތުގައި އޭނާ ހައްޔަރުކުރީ ފުލުހުންގެ ދައުރު އަދާކުރުމަށް ހުރަސް އެޅުމުގެ ތުހުމަތުގައެވެ.

މި މައްސަލައާ ގުޅިގެން ހައްޔަރުކޮށްފައިވަނީ ހދ. ކުޅުދުއްފުށި / މިލްކުރާގޭ، އަޙްމަދު ޝާހީން ޝަހީދު (18 އަހަރު) އެވެ.

ދިވެހި ފުލުހުންގެ ޚިދުމަތުން ވިދާޅުވީ، ރޭ 22:42 ގައި ހުޅުމާލޭ ރީތިގަސް މަގުގައި ބާރު ސްޕީޑުގައި ދުއްވަމުންދިޔަ ސައިކަލެއް މަޑުކުރުމަށް ފުލުހަކު އެންގުމުން، މަޑުނުކޮށް ދާން މަސައްކަތް ކޮށްފައިވާ ކަމަށެވެ.

އެ ސައިކަލް ހުއްޓުވަން އުޅުނު ފުލުސް މީހާގެ ގައިގައި ސައިކަލުން ޖައްސައި އެ ޒުވާނާ ވަނީ ފިލަން މަސައްކަތްކޮށްފައި ކަމަށް ވެސް ފުލުހުން ބުންޏެވެ. އެކަމާ ގުޅިގެން ފުލުހުންގެ ދައުރު އަދާކުރުމަށް ހުރަސް އެޅުމުގެ ތުހުމަތުގައި އޭނާ ހައްޔަރުކޮށްފައިވާ ކަމަށް ފުލުހުން ވިދާޅުވިއެވެ.

މި ހާދިސާގައި އަނިޔާވި ފުލުސް މީހާއަށް ހޮސްޕިޓަލުގައި ފަރުވާ ދިނުމަށްފަހު ވަނީ ދޫކޮށްލާފައެވެ.

ފުލުހުން މިހާރު ދަނީ މި މައްސަލަ ތަޙުޤީޤު ކުރަމުންނެވެ.