ޕާޓީގައި ތިބި މެންބަރުންގެ އަދަދު 10،000 އިން ދަށަށް ގޮސް ދައުލަތުގެ ބަޖެޓުން ކޮންމެ އަހަރަކު ފައިސާ ލިބޭ ލިސްޓުން އަދާލަތު ޕާޓީ އުނިވެއްޖެއެވެ. 

އިލެކްޝަންސް ކޮމިޝަނުން މިއަދު ވަނީ ދައުލަތުގެ ބަޖެޓުން ފައިސާ ލިބޭ ސިޔާސީ ޕާޓީތައް އާއްމުކޮށްފައެވެ. މީސްމީޑިއާގައި އާއްމުކުރި ޕޯސްޓުގައިވާ ގޮތުން އެ ލިސްޓުގައި ހިމެނެނީ ހަތަރު ޕާޓީއެކެވެ. 

ބަޖެޓުން ފައިސާ ލިބޭ ހަތަރު ސިޔާސީ ޕާޓީ އަކީ ވެރިކަންކުރާ ޕީއެންސީ (ކޮންގްރެސް ޕާޓީ)، އެމްޑީޕީ، ޖުމްހޫރީ ޕާޓީގެ އިތުރުން އެމްޑީއޭ އެވެ. 

އިލެކްޝަންސް ކޮމިޝަނުން ބުނީ ފައިސާ ލިބޭ ސިޔާސީ ޕާޓީތައް އަދާހަމަ ކުރީ އަންނަ އަހަރުގެ ދައުލަތުގެ ބަޖެޓް ފާސްކުރި ދުވަހަށް ބަލައިގެން ކަމަށެވެ. އެއީ 2025 ނޮވެމްބަރު 25 ވަނަ ދުވަހެވެ. އެދުވަހުގެ ނިޔަލަށް އަދާލަތު ޕާޓީގައި ތިބި މެންބަރުންގެ އަދަދު ވަނީ 10،000 އިން ދަށަށް ގޮސްފައެވެ. 

އަދާލަތު ޕާޓީ ރަޖިސްޓްރީ ކުރީ 2005 ވަނަ އަހަރުގެ އޮގަސްޓް 17 ވަނަ ދުވަހުއެވެ. އިލެކްޝަންސް ކޮމިޝަނުގެ އެންމެ ފަހުގެ އަދަދުތަކަށް ބަލާއިރު، އެ ޕާޓީގައި މިހާރު ތިބީ 8844 މެންބަރުންނެވެ. 

އިލެކްޝަންސްގެ ދަފްތަރުން ދައްކާގޮތުން ދަފްތަރުކުރެވިފައި 9 ސިޔާސީ ޕާޓީއެއް އޮތްއިރު 4 ޕާޓީއެއް ވަނީ އުވާލައިފައެވެ. 

ސިޔާސީ ޕާޓީތަކުގެ ޤާނޫނުގައި ވާގޮތުން، ކޮންމެ އަހަރެއްގެވެސް ދައުލަތުގެ ބަޖެޓުން 0.1 އާއި 0.2 އިންސައްތައާ ދެމެދުގެ އަދަދެއް ޕާޓީތަކަށް ދޭންޖެހެއެވެ. އެ ފައިސާ ސިޔާސީ ޕާޓީތަކަށް ދޭނީ 10،000 މެންބަރުން ހަމަވާ ޕާޓީތަކުގެ ތެރެއިން މެންބަރުން ތިބި އަދަދަށް ބަލައިގެންނެވެ. 

ރާއްޖޭގައި މިހާރު އޮތް އެންމެ ބޮޑު ސިޔާސީ ޕާޓީއަކީ ވެރިކަންކުރާ ކޮންގްރެސް ޕާޓީއެވެ. އެންމެ މެންބަރުން ގިނަ ޕާޓީގެ ހައިސިއްޔަތުން ދައުލަތުން ދޭ ފައިސާގެ އެންމެ ބޮޑު އަދަދެއް ލިބެނީ ވެސް އެޕާޓީއަށެވެ. 

ސިޔާސީ ޕާޓީތަކުގެ ދަފްތަރަށް ބަލާއިރު، ލިސްޓުން އުނިކޮށްފައިވާ ސިޔާސީ 4 ޕާޓީއަކީ، ދިވެހި ރައްޔިތުންގެ ޕާޓީ (ޑީއާރުޕީ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ އިތުރުން މޯލްޑިވްސް ތާރޑްވޭ ޑިމޮކްރެޓްސް (އެމްޓީޑީ) އަދި މޯލްޑިވްސް ރިފޯމް މޫވްމަންޓް އެވެ.