އެމަނިކުފާނު ރައްޔިތުންނާ ބައްދަލުކުރައްވާ ކުރެއްވުމުގައި ރައްޔިތުން ބޭނުންވާ ކޮންމެ ހިޔާލެއް ފާޅުކުރުމުގެ ފުރިހަމަ މިނިވަންކަން އޮންނާނެ ކަމަށާއި، އެމަނިކުފާނާމެދު ނުރުހޭ ފަރާތްތަކުގެ އަޑު އެއްސެވުމަކީ ލިބިވަޑައިގަންނަވާ އުފަލެއް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައްޔިތުންނާ ގާތުން، އެ ރައްޔިތުންގެ ހިޔާލާ މަޝްވަރާ ހޯއްދެވުމަށް ކުރައްވަމުންދާ މަސައްކަތްޕުޅުގެ ތެރެއިން މާލޭ ސަރަހައްދުގައި ދިރިއުޅޭ ރައްޔިތުންނާ ބައްދަލުކުރެއްވުމަށް ބާއްވަވާ ސިލްސިލާ ބައްދަލުވުންތަކުގެ ތެރެއިން މިރޭ މާފަންނުގެ ރައްޔިތުންނާ ބައްދަލުކުރައްވައި، އެ ރައްޔިތުންގެ ޝުއޫރުތަކާއި އިހުސާސްތައް އަޑުއެއްސެވުމަށްފަހު ދެއްކެވި ވާހަކަފުޅުގައި ރައީސް ވިދާޅުވީ މި ބައްދަލުވުންތަކުގައި ކޮންމެ ރައްޔިތަކަށްވެސް އެ ރައްޔިތެއްގެ އިހުސާސްތައް ހިއްސާކޮށް، ކުރަން ބޭނުންވާ ކޮންމެ ސުވާލެއް ކުރުމުގެ ފުރުސަތު އެމަނިކުފާނު ދެއްވާނެ ކަމަށެވެ. 

އިތުރަށް ރައީސް ވިދާޅުވީ ވެރިންނާ ސުވާލުކޮށް، އިހުސާސްތައް ހިއްސާކުރުމުގެ ފުރުސަތަކީ ކުރިން ރައްޔިތުންނަށް ލިބިފައިވާ ފުރުސަތަކަށްނުވާތީ އެ ފުރުސަތު ލިބުމުން ހުރިހާ ރައްޔިތުންވެސް އެ ފުރުސަތުގެ ބޭނުންކުރަން ބޭނުންވާނެކަން ގަބޫލުކުރައްވާ ކަމަށެވެ. އަދި އެމަނިކުފާނު ބޭނުންފުޅުވަނީ ރައްޔިތުންނާ ބައްދަލުކުރައްވައި ގާތުން މަސައްކަތްކުރެއްވުންކަން ފާހަގަކުރައްވަައި އެމަނިކުފާނު ވިދާޅުވީ ވަގުތު ލިބިވަޑައިގަންނަވާ މިންވަރަކުން ކުރިއަށް އޮތް ތަނުގައިވެސް މާލެއާއި ރަށްރަށުގެ ރައްޔިތުންނާ ބައްދަލުކުރައްވަމުންގެންދަވާނެ ކަމަށެވެ

"މި ބައްދަލުވުންތައް މިބާއްވަނީ ހުރިހާ ވާހަކަތަކެއްވެސް ހިއްސާކުރުމުގެ ފުރުސަތު ދިނުމުގެ ގޮތުން. އަޅުގަނޑު އެއްގޮތަކަށްވެސް ކަންބޮޑުނުވޭ އަޅުގަނޑާ ހިޔާލު ތަފާތުވާ ބޭފުޅަކު އެއްޗެއް ވިދާޅުވެގެން. އަޅުގަނޑު މަރުހަބާ ކިޔަން އެގޮތަށް ވާހަކަދައްކަވަން. ބޭނުންފުޅުވާ ކޮންމެ އެއްޗެއްވެސް ވިދާޅުވާންވީ،" ރައީސް ވިދާޅުވިއެވެ. 

އަދި ހިޔާލު ފާޅުކުރާ ރައްޔިތުންގެ ސިޔާސީ ފިކުރަށް ނުވަތަ އެނޫންވެސް ކަމަކަށް ނުބައްލަވައި އެމަނިކުފާނު ހުރިހާ ބޭފުޅުންގެ އަޑުއައްސަވާނެ ކަމުގައި ވިދާޅުވުމާއެކު، ރައީސް ފާހަގަކުރެއްވީ އެއިން ކޮންމެ ބޭފުޅެއްގެ ކަންބޮޑުވުމަށްވެސް ހައްލުތަކެއް ހޯއްދަވައިދެއްވަން ކަމަށެވެ. އަދި އެމަނިކުފާނު ހުރިހާ ރައްޔިތުންގެ ހިޔާލުތަކާއި އިހުސާސްތަކަށްވެސް އިހުތިރާމުކުރައްވާ ކަމުގައި ރައީސް ވިދާޅުވިއެވެ.