ނިޝާން އަސްކަރީގެ ވެރިކަމުގެ އިއްޒަތް، މޭޖާ ޖެނެރަލް (ރިޓަޔަޑް) މޫސާ އަލީ ޖަލީލަށް އެރުވުމަށް، ރައީސް ޑރ. މުހައްމަދު މުއިއްޒު ނިންމަވައިފި އެވެ.

ގައުމާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ހިދުމަތްތަކެއްކުރައްވައި ގައުމުގެ އިސްތިގްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި މޫސާ އަލީ ވަނީ ގިނަގުނަ މަސައްކަތްތަކެއް ކޮށްދެއްވާފައެވެ.

ޚާއްސަކޮށް 3 ނޮވެމްބަރ 1988 ގެ އުދުވާނީ ހަމަލާއާ ގުޅިގެން ދިވެހި ގައުމާއި ރައްޔިތުންގެ ދިފާއުގައި މޫސާ އަލީ ކުރެއްވި މަސައްކަތް ފާހަގަކުރެވެ އެވެ. މި ހުރިހާ މަސައްކަތްތަކެއްގެ އަގު ވަޒަންކުރުމުގެ ގޮތުން ނިޝާން އަސްކަރީގެ ވެރިކަމުގެ އިއްޒަތް މޫސާ އަލީއަށް އަރުވަން ނިންމާފައިވެއެވެ. 

މި އިއްޒަތް ދެއްވުމަށް ރަޢީސުލްޖުމްހޫރިއްޔާ ޑރ.މުޙައްމަދު މުއިއްޒު ނިންމެވީ ދިވެހިރާއްޖޭގެ އިއްޒަތުގެ ގާނޫނުގެ ދަށުން ރައީސްއަށް ލިބިވަޑައިގަންނަވާ އިހްތިޔާރުގެ ދަށުންނެވެ.

ރައީސް އޮފީހުން ބުނީ މި އިއްޒަތް މޫސާ އަލީއަށް އެރުވުން އޮންނާނީ މި އަހަރުގެ ނަސްރުގެ ދުވަހުގެ މުނާސަބަތުގައި މިރޭ 8:30 ގައި ދަރުބާރުގޭގައި ބާއްވާ ރަސްމީ ޖަލްސާގަ އެވެ.