ރަތް ކަނޑަށް ޓޫރިސްޓް ބޯޓެއް ފެތި 17 މީހުން ގެއްލިފައިވާ ކަމަށް މިސްރުގެ ކަމާބެހޭ ފަރާތްތަކުން މިރޭ ބުނެފި އެވެ.

މި ހާދިސާގައި ވަނީ 28 މީހުން ސަލާމަތްކޮށްފައެވެ. ގެއްލުނު މީހުންގެ ތެރޭގައި އިނގިރޭސި ރައްޔިތަކު ވެސް ހިމެނެއެވެ. ފިންލޭންޑުން ވެސް ވަނީ އެ ގައުމުގެ ރައްޔިތަކު ގެއްލިފައިވާކަން ޔަގީންކޮށްދީފައެވެ. 

ޓޫރިސްޓު ބޯޓުގައި ތިބީ 31 ޓޫރިސްޓުންނާއި 14 ފަޅުވެރިންނެވެ. ފަޅުވެރިންގެ ގޮތުގައި ތިބީ މުޅިން ވެސް މިސްރު މީހުންނެވެ. ބޯޓުގައި ތިބި ޓޫރިސްޓުންގެ ތެރޭގައި ސްޕޭނުގެ ފަސް މީހުން، އިނގިރޭސި ވިލާތުގެ ހަތަރު މީހުން، ޖަރުމަނުގެ ހަތަރު މީހުން އަދި އެމެރިކާގެ ދެ މީހުން ހިމެނެއެވެ. ޗައިނާގެ ދެ ޓޫރިސްޓަކު ވެސް ބޯޓުގައި ތިބި ކަމަށްވެއެެވެ.

ބޯޓުން ސަލާމަތްވި މީހުންނަށް ފުރަތަމަ އެހީ ދިނުމަށް ތައްޔާރުވެފައި. --ފޮޓޯ:އީޕީއޭ

ރެޑް ސީ ގަވަރުނަރު މޭޖަރ ޖެނެރަލް އަމްރު ހަނަފީ ވިދާޅުވީ މީހުން ސަލާމަތް ކުރުމުގެ އޮޕަރޭޝަނުގައި މިސްރުގެ ކަނޑުގެ ސިފައިންގެ މަނަވަރުތަކާއި ވައިގެ ސިފައިންގެ މަތިންދާބޯޓުތައް ބޭނުންކުރަމުންދާ ކަމަށެވެ.

ބޯޓު ފެތެން މެދުވެރި ހާދިސާގެ ތަފްސީލް އަދި ހާމަކޮށްފައެއް ނުވެއެވެ. ނަމަވެސް މޫސުމާ ބެހޭ ފަރާތްތަކުން ވަނީ އާދިއްތަ އަދި ހޯމަ ދުވަހު ކަނޑު ދަތުރުތައް ނުކުރުމަށް ލަފާދީފައެވެ.

ސީ ސްޓޯރީ ނަމަކަށް ކިޔާ ބޯޓު ފަސް ދުވަހުގެ ދަތުރެއްގައި މަރްސާ އާލަމް ބަނދަރުން ފުރީ އާދިއްތަ ދުވަހު އެވެ. 

ފެތުނު ބޯޓު ބަނދެފައި ވަނީ 2022 ވަނަ އަހަރު އެވެ. ގާތްގަނޑަށް 144 ފޫޓު ހުންނަ ބޯޓުގައި ހަތަރު ޑެކް ހިމެނެއެވެ. އެ ބޯޓުގައި 18 ކޮޓަރި ހުރެއެވެ.