ފަތުރުވެރިންނަށް ޚާއްސަކޮށްގެން ހިންގާ މޫދު ކުޅިވަރާއި މޫދާ ގުޅުންހުރި އެހެނިހެން ހަރަކާތްތައް ކުރިއަށް ގެންދިއުމާ ގުޅޭ ޤަވާއިދެއް އެކުލަވާލުމުގެ މަސައްކަތް ކުރަމުންދާ ކަމަށް ފަތުރުވެރިކަމާބެހޭ ވުޒާރާއިން ބުނެފިއެވެ.

އެ ވުޒާރާ އިން ނެރުނު ސާކިއުލާގައި ބަޔާންކޮށްފައިވާ ގޮތުގައި، ފަތުރުވެރިންނަށް ޚާއްސަކޮށްގެން ކުރިއަށްގެންދާ މޫދު ކުޅިވަރާއި އެހެނިހެން ހަރަކާތްތަކުގައި އެކްސިޑެންޓުތަކާއި ފުރާނައަށް ގެއްލުންވާފަދަ ހާދިސާތައް މިހާތަނަށް ހިނގާފައިވާކަން ފާހަގަކުރެވިފައިވެއެވެ. މިފަދަ ކަންކަން ހުއްޓުވުމަށް އަވަސް ފިޔަވަޅުތަކެއް އެޅުމަށް އެ ވުޒާރާއިން މަސައްކަތް ކުރަމުންދާ ކަމަށް ވެސް ބަޔާންކޮށްފައިވެއެވެ.

ޤަވާއިދު އެކުލަވާލެވެންދެން، މިފަދަ ހަރަކާތްތައް ހިންގުމުގައި ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް އާންމު މިންގަނޑެއް ވަނީ ސާކިއުލާއާ އެކު އާންމުކޮށްފައެވެ. މި މިންގަނޑުގައި، ފަތަން ނޭނގޭ ފަތުރުވެރިންނަށް ލައިފް ޖެކެޓު އެޅުވުމާއި، ސަލާމަތީ ވަސީލަތްތައް ފުރިހަމައަށް ގެންގުޅުމަށް އަންގާފައިވެއެވެ. އަދި މޫސުމާބެހޭ މަޢުލޫމާތު ފަތުރުވެރިންނަށް ދިނުމާއި، ވަކި ސަރަހައްދެއްގައި ކުރިއަށްގެންދަންޖެހޭ ހަރަކާތްތައް އެ ސަރަހައްދެއްގައި ކުރިއަށްގެންދިއުމަށް ވެސް ވަނީ ހިމަނާފައެވެ.

ސޯޅަ އަހަރުން ދަށުގެ ކުދިން މިފަދަ ހަރަކާތްތަކުގައި ބައިވެރިކުރެވޭނީ ބެލެނިވެރިޔާގެ ހުއްދަ ލިޔުމުން ހޯދައިގެންކަމަށް ވެސް މި އާ މިންގަނޑުގައި ބަޔާންކޮށްފައިވެއެވެ.

ކުރިއަށް އޮތީ ފަތުރުވެރިކަމުގެ ޕީކް ސީޒަން ކަމަށްވާތީ، މި މިންގަނޑުގައި ހިމެނޭ ކަންކަމަށް ޢަމަލުކުރުމަށް ފަތުރުވެރިކަމާބެހޭ ވުޒާރާއިން ވަނީ އިލްތިމާސްކޮށްފައެވެ. އަދި ފަތުރުވެރިންގެ ސަލާމަތާއި ރައްކާތެރިކަމަށްޓަކައި ކުރެވެން ހުރި ހުރިހާ ކަމެއްގައި އެއްބާރުލުން ދިނުމަށް އެދިފައިވެއެވެ.