އެއާޕޯޓުގެ ފުލް-ސްކޭލް އިމާޖެންސީ އެކްސަސައިޒްގެ އެންމެފަހުގެ ތައްޔާރީތަކާ ގުޅޭ މައުލޫމާތު ހިއްސާކުރުމަށް ހާއްސަ ބައްދަލުވުމެއް ބާއްވައިފިއެވެ. 

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ދިމާވެދާނެ އެމަޖެންސީ ހާލަތަކަށް ތައްޔާރުވެ ތިބުމަށް ބާއްވަން ނިންމާފައިވާ އެއާޕޯޓް ފުލް-ސްކޭލް އެމަޖެންސީ އެކްސަސައިޒް (އެފެކްސް)ގެ އެންމެ ފަހުގެ ތައްޔާރީތަކާ ގުޅޭ މައުލޫމާތު ހިއްސާކުރުމަށް ހާއްސަ ބައްދަލުވުމެއް ބާއްވާފައިވާ ކަމަށެވެ. 

އެ ކުންފުނިން ބުނީ އެފެކްސްގެ ބޭނުމަކީ ދިމާވެދާނެ އެމަޖެންސީ ހާލަތެއްގައި ވީއައިއޭގެ އެމަޖެންސީ ޕްލޭން އަދި މުއައްސަސާތަކުގެ އެސްއޯޕީތަކާއި އެ ހަރަކާތުގައި ބައިވެރިވާ އެއާލައިންގެ ކުއްލި ހާލަތުގެ ޕްލޭން ޓެސްޓުކުރުން ކަމަށެވެ.

އެ ހަރަކާތް މި އަހަރު ބާއްވަން ނިންމާފައިވަނީ 8 ސެޕްޓެމްބަރު 2025 ގައި ކަމަށާ ހަރަކާތުގެ ޕާޓްނަރު އެއާލައިނަކީ ގަތަރު އެއާވޭސް ކަމަށް ވެސް އެމްއޭސީއެލް އިން ބުންޏެވެ. 

ހުޅުލެ އައިލެންޑް ހޮޓެލްގައި މިއަދު ބޭއްވި ހާއްސަ ބައްދަލުވުން ޝަރަފުވެރި ކޮށްދެއްވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދުއެވެ. ބައްދަލުވުމުގައި އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފުގެ އިތުރުން އެމްއޭސީއެލްގެ އެކްސްކޯ އަދި ސީނިއާ މެނޭޖުމަންޓުގެ ބޭފުޅުންނާއި އެފެކްސްގެ ޕާޓްނަރު އެޖެންސީތަކުގެ އިސްވެރިން ބައިވެރިވެވަޑައިގެންނެވިއެވެ.

ބައްދަލުވުމުގައި ވާހަކަދައްކަވަމުން ސީއީއޯ ޝަރީފު ވިދާޅުވީ ވެލާނާއިންޓަނޭޝަނަލް އެއާޕޯޓް އޮޕަރޭޓްކުރާ ކުންފުނީގެ ހައިސިއްޔަތުން އެއާޕޯޓްބޭނުންކުރާ ފަސިންޖަރުންނާއި އެއާލައިންތަކާއި އަދި އެއާޕޯޓުގައިމަސައްކަތްކުރާ ހުރިހާ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަކީ އެމްއޭސީއެލްގެ އެންމެ އިސް ވާޖިބު ކަމަށެވެ.

އެފެކްސްގެ ޕްލޭނިންގައި ހުރިހާ އިދާރާއަކާއި މުއައްސަސާއަކުން ދެއްވި އެއްބާރުލުން ފާހަގަކުރައްވައި ސީއީއޯ ޝަރީފު ވިދާޅުވީ، ހުރިހާ އިދާރާއަކާއި މުއައްސަސާތަކުން ދެއްވަމުން އަންނަ އެއްބާރުލުމާއި އެހީތެރިކަމަކީ އެއާޕޯޓުގެ ސަލާމަތާއި ރައްކާތެރިކަން ކަށަވަރު ކުރުމަށް ލިބޭ ވަރަށް ބޮޑު ހިތްވަރެއް ކަމެއް ކަމަށެވެ.

މިއަދުގެ ބައްދަލުވުމުގައި އެފެކްސްގެ ޕާޓްނަރު އެޖެންސީތަކުގެ ތެރެއިން މޯލްޑިވްސް ނެޝަނަލް އެއާ ޓްރެފިކް ސާވިސަސް (އެމްނެޓްސް), މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް), މޯލްޑިވްސް ޕޮލިސް ސާވިސް, ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ), އެއާލައިން އޮޕަރޭޓާސް ކޮމިޓީ, މޯލްޑިވްސް އިމިގްރޭޝަން, ހެލްތް މިނިސްޓްރީ, އޭވިއޭޝަން ސެކިއުރިޓީ ކޮމާންޑް (އެވްސެކޮމް), ޑިރެކްޓޮރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަން (ޑާސާ), މޯލްޑިވްސް ރެޑް ކްރެސެންޓް (އެމްއާރުސީ), މިނިސްޓްރީ އޮފް ޓޫރިޒަމް, މޯލްޑިވްސް ކަސްޓަމްސް ސާވިސް, މިނިސްޓްރީ އޮފް ފޮރިން އެފެއާޒް, މޯލްޑިވްސް މީޓިއޮރޮލޮޖިކަލް ސާވިސް, އޭޑީކޭ ހޮސްޕިޓަލް, އިންދިރާ ގާންދީ މެމޯރިއަލް ހޮސްޕިޓަލް, ހުޅުމާލެ ހޮސްޕިޓަލް, ޓްރީ ޓޮޕް ހޮސްޕިޓަލް ޓީއެމްއޭ, މަންޓާ އެއާ, އައިލެންޑް އޭވިއޭޝަން ސާވިސް އަދި މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ) އިން ބައިވެރިވިއެވެ.

މިއަދުގެ ބައްދަލުވުމުގައި އެއާޕޯޓް އެމަޖެންސީ ޕްލޭނިން ޓީމުގެ ފަރާތުން ވަނީ އެފެކްސްގައި ހާސިލުކުރަން ބޭނުންވާ އަމާޒުތައް ޕާޓްނަރު އެޖެންސީތަކާ ހިއްސާކޮށްފައެވެ. އޭގެ އިތުރުން ގަތަރު އެއާވޭސްގެ ފަރާތުންނާއި މާލެ ސިޓީ ގުރޫޕް އޮފް ހޮސްޕިޓަލްސް (އެމްސީޖީއެޗް)ގެ އިތުރުން ފުލުހުންނާއި އޭވިއޭޝަން ސެކިއުރިޓީ ކޮމާންޑް (އެވްސެކޮމް)ގެ ފަރާތުން އެންމެ ފަހުގެ މައުލޫމާތު ހިއްސާކޮށްފައިވެއެވެ.

އެފެކްސް އަކީ މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ) އާއި އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ކަނޑައަޅާފައިވާ މިންގަނޑުތަކާ އެއްގޮތަށް ވީއައިއޭގައި ދިމާވެދާނެ ކުއްލި ހާލަތަކަށް ތައްޔާރުވުމަށް އަޅަންޖެހޭ ފިޔަވަޅުތައް ތަންފީޒު ކުރާކަން ކަށަވަރު ކުރުމަށް ލާޒިމުކުރާ ހަރަކާތެކެވެ.

ވީއައިއޭގައި އެއާޕޯޓް ފުލް-ސްކޭލް އެމަޖެންސީ އެކްސަސައިޒް (އެފެކްސް) އެންމެ ފަހުން ބޭއްވީ 2022 ވަނަ އަހަރު އެވެ. މި އަހަރުގެ އެފެކްސްގައި 33 އިދާރާއަކުން ބައިވެރިވާއިރު, ވޮލަންޓިއަރުންގެ ގޮތުގައި 400 އެއްހާ ފަރާތުން ބައިވެރިވާނެއެވެ.