ރާއްޖެއަށް ފުރަތަމަ ފަހަރަށް ވޯލްޑް ލީޑިން ގްރީން ޑެސްޓިނޭޝަން އެވޯޑް ލިބިއްޖެ އެވެ.

ޕޯޗުގަލްގެ މަދޭރާގައި އިއްޔެ ބޭއްވި ވޯލްޑް ޓްރެވަލް އެވޯޑްސްގެ ގްރޭންޑް ފައިނަލް ގާލާގައި ދިން މި އެވޯޑަކީ ތިމާވެއްޓާ ރައްޓެހި އަދި ދެމެހެއްޓެނިވި ފަތުރުވެރިކަމެއް ހިންގާ މަންޒިލްތަކަށް ދޭ ޚާއްޞަ އެވޯޑެކެވެ. 

މި ތާރީޚީ ކާމިޔާބީއާ ގުޅިގެން ފަތުރުވެރިކަމާބެހޭ ވުޒާރާއިން ބުނީ، މި އެވޯޑުން ދައްކުވައިދެނީ ރާއްޖޭގެ ޤުދުރަތީ ވެށި ރައްކާތެރިކުރުމަށާއި ދެމެހެއްޓެނިވި ފަތުރުވެރިކަމުގެ އާދަތައް ކުރިއެރުވުމަށް ރާއްޖެއިން ދޭ އަހައްމިއްޔަތުކަން ބައިނަލްއަޤުވާމީ ފެންވަރުގައި ވެސް ބަލައިގަނެފައިވާ މިންވަރު ކަމަށެވެ.

މި އެވޯޑާ ހަވާލުވެވަޑައިގަތުމަށްފަހު ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވީ، މި ކާމިޔާބީއަކީ ފަތުރުވެރިކަމުގެ ދާއިރާގައި ހިމެނޭ އެންމެހައި ފަރާތްތަކުގެ މަސައްކަތުގެ ނަތީޖާ ކަމަށެވެ. އޭގެ ތެރޭގައި ރިސޯޓުތަކާއި، ޑައިވް ސެންޓަރުތަކާއި، އެއަރލައިންތަކާއި، ޓްރެވަލް އޭޖެންސީތަކާއި، ޓުއަރ ގައިޑުންނާއި، ދާއިރާގައި މަސައްކަތްކުރާ އެންމެހައި މުވައްޒަފުން އަދި މުޅި މުޖުތަމަޢު ހިމެނޭ ކަމަށް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، މި އެވޯޑުން ދައްކުވައިދެނީ ދިވެހިރާއްޖެއަށް ދުނިޔޭގެ ފެންވަރުގައި ލިބިފައިވާ ކާމިޔާބީގެ ފަހަތުގައިވަނީ، އެންމެން ގުޅިގެން ކުރާ މަސައްކަތާއި، ފަތުރުވެރިންނަށް ދޭ ޚިދުމަތްތަކުގެ ފެންވަރު ހިފެހެއްޓުމަށް ކުރާ މަސައްކަތުގެ އިތުރުން ތިމާވެށި ރައްކާތެރިކުރުމަށް ކުރާ މަސައްކަތްތައް ކަމަށެވެ.

މި އެވޯޑުގެ އިތުރުން، ވޯލްޑް ޓްރެވަލް އެވޯޑްސްގައި ދިވެހިރާއްޖެއަށް ވަނީ އިތުރު އެވޯޑުތަކެއް ވެސް ލިބިފައެވެ.