ވޯލްޑް ޓްރެވަލް އެވޯޑްސްގެ "ވޯލްޑް ލީޑިންގ ޑެސްޓިނޭޝަން" ގެ މަގާމު ޖެހިޖެހިގެން ފަސްވަނަ އަހަރަށް ދިވެހި ރާއްޖެއަށް ލިބުމެވެ.

ޕޯޗުގަލްގެ މެޑީރާގައި ބޭއްވި އެ ހަފްލާގައި އެވޯޑާ ހަވާލުވެވަޑައިގަތީ ޓޫރިޒަމް މިނިސްޓަރު އިބްރާހިމް ފައިސަލް އާއި ޓޫރިޒަމް މާކެޓިން ކުންފުނި، އެމްއެމްޕީއާރްސީގެ މެނޭޖިންގ ޑިރެކްޓަރ އިބްރާހިމް ޝިއުރީ އެވެ.

ޓޫރިޒަމް ދާއިރާގެ އެންމެ ޝަރަފްވެރި އެވޯޑް ލިބުމާ ގުޅިގެން ޓޫރިޒަމް މިނިސްޓަރު ފައިސަލް ވިދާޅުވީ މިއީ ދިވެހި ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ އެންމެހާ ފަރާތްތަކުގެ ހިތްވަރާއި މަސައްކަތުގެ ނަތީޖާ ކަމަށެވެ. 

ވޯލްޑް ޓްރެވަލް އެވޯޑްސް އަކީ 1993 ވަނަ އަހަރު ތައާރަފްކުރި، ދަތުރުފަތުރުގެ ދާއިރާގައި އެންމެ މަގުބޫލުކަން ހޯދައިފައިވާ އެވޯޑެވެ.

ޓޫރިޒަމް މިނިސްޓަރު އިތުރަށް ވިދާޅުވީ މި ކާމިޔާބީއާ އެކު ދިވެހިރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ އެންމެހާ ފަރާތްތަކަށް މަރުހަބާ ދަންނަވާ ކަމަށެވެ. އަދި ކުރިއަށް އޮތް ތަނުގައިވެސް މި ދާއިރާ އިތުރަށް ކުރިއެރުވުމަށް މަސައްކަތް ކުރާނެ ކަމަށް އެ މަނިކުފާނު ވިދާޅުވިއެވެ.