ހއ. އުތީމުގައި ފާހަގަކުރާ ޤައުމީ ދުވަހާއެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހީންގެ މިނިވަންކަން ޙިމާޔަތްކުރެއްވުމަށް ގެންގުޅުއްވާ ސިޔާސަތާއި އޭގެ ބޭނުންތެރިކަން ހާމަވާކަމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. 

ވަޒީރު އާދަމް ނަސީރު މިފަދައިން ވިދާޅުވީ، މިއަހަރުގެ ޤައުމީ ދުވަސް ރަސްމީކޮށް ފާހަގަކުރުމުގެ ގޮތުން އުތީމުގައި ބޭއްވި ރަސްމީ ޖަލްސާގައި ވާހަކަދައްކަވަމުންނެވެ. 

ވަޒީރު ވިދާޅުވީ، ޤައުމީ ކަންކަމުގައި ރައީސުލްޖުމްހޫރިއްޔާ ދެއްވާ ޚާއްޞަ އިސްކަމުގެ އެންމެ ބޮޑު ބޭނުންފުޅަކީ ދިވެހި ދައުލަތް ދެމިއޮތުން ކަމަށެވެ. 

ދިވެހި ޤައުމިއްޔަތާއި، ދިވެހީންގެ މިނިވަންކަން ޙިމާޔަތްކުރެއްވުމަށްޓަކައި ކުރައްވާ މަސައްކަތްޕުޅުތަކާއި، އުތީމުގައި ޤައުމީ ދުވަސް ކުލަގަދަކޮށް ކުރިއަށްގެންދިއުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އިރުޝާދަށްޓަކައި އަދި ފުރިހަމަ އެއްބާރުލެއްވުމަށްޓަކައި ވަޒީރު އާދަމް ނަސީރު ވަނީ ރައީސުލްޖުމްހޫރިއްޔާއަށް ޝުކުރުދަންނަވާފައެވެ. 

ވަޒީރު ވިދާޅުވީ ދިވެހީންނަކީ 4000 އަހަރުވީ ތާރީޚުގައި ދިވެހި ދައުލަތް މިނިވަންކަމާއެކީ ދަމަހައްޓާފައިވާ ބައެއް ކަމަށެވެ. ދޭތެރެދޭތެރެއިން ލޮޅުން އަޔަސް އެއިން ކޮންމެ ލޮޅުމެއްގައި ކުޑަކޮށް ފަހަތަށް ޖެހިލާފަ ﷲގެ އިރާދަފުޅާއެކު ނަޞްރާއި ފަތަހަ ދިވެހީންނަށް ލިބޭކަމަށް ވަޒީރު ވިދާޅުވިއެވެ. 

ޤައުމީ ދުވަހަކީ ރާއްޖޭގެ ތާރީހުގައި އަންނަ ވަރަށް ޚާއްޞަ އަދި މުހިއްމު ދުވަހެއް ކަމަށާއި، ޤައުމީ ދުވަސް މުހިއްމުވަނީ އެއީ ދިވެހީންގެ ސަލާމަތާއި ރައްކާތެރިކަމާއި ގުޅިފައިވާ މުހިއްމު ޚައްޞަ ދުވަހަކަށް ވާތީކަމަށް ވަޒީރު ވިދާޅުވިއެވެ.