ކޮންމެ އަތޮޅެއްގައި ސަރުކާރުން ޕިކްނިކް ދާނެ ރަށެއް ތަރައްޤީކުރުމުގެ މަޝްރޫޢު ފައްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ އަރިއަތޮޅު އުތުރުބުރީގެ ރަށްތަކަށް ކުރައްވާ ދަތުރުފުޅުގައި މިރޭ އއ. މަތިވެރީ ރައްޔިތުންނާ މުޚާތަބުކޮށް ދެއްކެވި ވާހަކަފުޅުގައެވެ. 

ރައީސުލްޖުމްހޫރިއްޔާ ވިދާޅުވީ ރަށްރަށަށް ވަޑައިގަތުމުން ޕިކްނިކް އައިލެންޑް ތަރައްޤީކުރުމުގެ ހުށަހެޅުންތައް ލިބިވަޑައިގަންނަވާ ކަމަށެވެ. އެގޮތުން ފަތުރުވެރިކަން ފުޅާވެފައިވާ އަތޮޅުތަކުގައި އެފަދަ ފުރުޞަތުތައް ނެތުމާއި، ފަތުރުވެރިކަން ނޫނަސް ރަށްރަށުގެ ރައްޔިތުން ޕިކްނިކް ދާނެ ރަށެއް ނެތުމުން ވެސް ހުށަހެޅުން ލިބެމުން އަންނަކަމަށް ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވިދާޅުވީ ވަރަށް އަވަހަށް ރާއްޖޭގެ ހުރިހާ އަތޮޅެއްގައި، ކޮންމެ އަތޮޅަކުން އެއްރަށް ނަގައި އެ އަތޮޅުގެ ރައްޔިތުންނަށް، އަދި ފަތުރުވެރިންގެ ބޭނުންތަކަށް ވިސްނައިގެން ކޮންމެ އަތޮޅަކުން ރަށެއް ޕިކްނިކް ދިއުމަށް ތަރައްޤީކުރައްވާނެ ކަމަށެވެ. 

ރައީސުލްޖުމްހޫރިއްޔާ ވިދާޅުވީ އެ މަޝްރޫޢު ކުރިއަށްގެންދިއުމާ ގުޅޭ ދިރާސާތައް މިހާރު ފައްޓަވާފައިވާކަމަށެވެ. އަދި ކެބިނެޓްގައި މަޝްވަރާކުރުމަށްފަހު ކެބިނެޓްގެ ނިންމެވުމާ އެއްގޮތަށް އަތޮޅުތަކުގައި ޕިކްނިކް ރަށް ތަރައްޤީކުރުމުގެ މަޝްރޫޢު ފައްޓަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.