ދަރިކަލުންނާއި ގުޅޭގޮތުން ފަތުރަނީ ހަޤީޤަތާއި ޚިލާފު ވާހަކަތަކެއް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމްގެ ދަރިކަލުން އަބްދުالله މާހިލް ޝަހީމް, ގައިގައި ބަނދެގެން ވަގަށް ވޭޕް އެތެރެކުރަން އުޅުމުން އެތަކެތި އަތުލާ މިލިއަން ރުފިޔާ އިން ޖޫރިމަނާކޮށްފައިވާ ކަމަށް ބުނެ ބަޔަކު ދަނީ ވާހަކަތަކެއް ފަތުރަމުންނެވެ. ބައެއް ނޫސްތަކުން ވެސް އެ ވާހަކަތައް ރިޕޯޓް ކޮށްފައިވެ އެވެ.

އެކަން ދޮގު ކުރައްވާ މިނިސްޓަރު ޝަހީމް ވިދާޅުވީ ގައިގައި ބަނދެގެން ވޭޕް ސާމާނު އެތެރެކުރި ކަމަށް ބުނެ ހަޤީޤަތާއި ޚިލާފު ވާހަކަތައް ފެތުރުމަކީ ދެރަ ކަމެއް ކަމަށެވެ. އަދި މާހިލް އަކީ މެލޭޝިޔާގެ އެމްބަސީގައި ވަޒީފާގައި ހުރި މީހެއް ނޫން ކަމަށް ވެސް ވަޒީރު ވިދާޅުވި އެވެ.

މިނިސްޓަރު ވަނީ އެފަދަ ވާހަކަތައް ނުފެތުރުމަށާއި ޙަޤީޤަތާއި ޚިލާފު ވާހަކަތައް ރަނގަޅު ކުރުމަށް ވެސް އެދިވަޑައިގެންފަ އެވެ.