ރަޝިޔާ- ޔޫކްރެއިން ހަނގުރާމައިގެ މަސްރަޙު އިތުރަށް ނުރައްކާވެ، ބޮޑު ހަނގުރާމައަކާ ދިމާއަށް ދުނިޔެ މިސްރާބު ޖަހާފައިވާ ކަމަށް ވިދާޅުވެ ރަޝިޔާގެ ރައީސް ލަޑިމިއާ ޕުޓިން އިންޒާރު ދެއްވައިފިއެވެ.

މި އިންޒާރު ދެއްވާފައިވަނީ ރަޝިޔާއިން އަޑަށްވުރެ ބާރަށް ދަތުރުކުރާ ހައިޕަރސޮނިކް މިސައިލެއް ބޭނުންކޮށްގެން ޔޫކްރެއިނަށް ނުރައްކާތެރި ޙަމަލާތަކެއް ދިނުމާ ގުޅިގެންނެވެ.

މަސްރަޙު ދިރާސާކުރާ ފަރާތްތަކުން ބުނެފައިވަނީ މި ޙަމަލާއަކީ ހުޅަނގަށް ދީފައިވާ ނުރައްކާތެރި އިންޒާރެއް ކަމަށެވެ. އަދި ހުޅަނގުން ފަހަތަށް ނުޖެހިއްޖެނަމަ، އެމެރިކާ އާއި އިނގިރޭސިވިލާތުގެ އަސްކަރީ މަރުކަޒުތަކަށް ރަޝިޔާއިން ޙަމަލާދޭނެ ކަމުގެ އިންޒާރު ދީފައިވާ ކަމަށް ޤަބޫލުކުރާ ކަމަށެވެ.

ރަޝިޔާ-ޔޫކްރެއިން ހަނގުރާމައިގައި، އެމެރިކާ އާއި ހުޅަނގުގެ ދިފާޢީ އިއްތިޙާދު (ނޭޓޯ) އިން ދަނީ ޔޫކްރެއިނަށް ވާގިވެރިވަމުންނެވެ. އެމެރިކާ އިން ޔޫކްރެއިނަށް އެތައް ބިލިޔަން އެމެރިކާ ޑޮލަރުގެ ހަތިޔާރާއި އަސްކަރީ އެހީތެރިކަން ފޯރުކޮށްދެމުން ދިޔަ ނަމަވެސް، ރަޝިޔާގެ ސިޓީތަކަށް ޙަމަލާ ދިނުމަށް އެ ހަތިޔާރުތައް ބޭނުން ކުރުން އޮތީ މަނާކޮށްފައެވެ. ނަމަވެސް، އެމެރިކާގެ ރައީސް ޖޯ ބައިޑަން ދާދިފަހުން ވަނީ އެ ކަމުގެ ހުއްދަ ޔޫކްރެއިނަށް ދެއްވައިފައެވެ.

މި ފުރުޞަތުގެ ބޭނުންކޮށް ޔޫކްރެއިނުން ރަޝިޔާގެ ސިޓީތަކަށް ޙަމަލާތައް އަމާޒު ކުރަން ފެށުމުން ޕުޓިން ވިދާޅުވީ ރަޝިޔާ-ޔޫކްރެއިން ހަނގުރާމަ، ދުނިޔޭގެ ބޮޑު ހަނގުރާމައަކަށް ބަދަލުވުމުގެ ފުރުޞަތު އޮތް ކަމަށާއި، ދަތުރު ކުރަމުން ދަނީ އެ މިސްރާބަށް ކަމަށެވެ.

ރަޝިޔާގެ ރިޔާސީ ގަނޑުވަރު، ކްރެމްލިން އިން ބުނެފައިވަނީ ރަޝިޔާގެ ރަށްތަކަށް ޙަމަލާ ދިނުމަށް ޔޫކްރެއިނުން ބޭނުން ކުރަމުންދާ ހަތިޔާރު ފޯރުކޮށްދޭ ޤައުމުތަކުގެ އަސްކަރީ އަމާޒުތަކަށް ޙަމަލާ ދިނުމަކީ ރަޝިޔާއަށް ލިބިގެންވާ ޙައްޤެއް ކަމަށެވެ.

ރަޝިޔާގެ މަޞްދަރަކުން ބުނެފައިވަނީ، ހަނގުރާމައިގެ މަސްރަޙު އިތުރަށް ގޯސްވުމަށް، ނުވަތަ ހުޅަނގާ ދެކޮޅަށް ބޮޑު ހަނގުރާމައެއް ފެށުމަށް ޕުޓިން ބޭނުންފުޅު ނުވާ ކަމުގައެވެ. ނަމަވެސް ނިއުކްލިޔަރ ހަތިޔާރު ބޭނުން ކުރުމުގެ ފުރުޞަތު ރަޝިޔާއަށް ލިބިގެންވާ ކަމުގައި ވެސް އެ ޤައުމުގެ މަޞްދަރުން ބުނެފައިވެއެވެ.

އެމެރިކާގެ ރިޔާސީ އިންތިޚާބުގައި ރިޕަބްލިކަން ޕާޓީގެ ކެނޑިޑޭޓު، ކުރީގެ ރައީސް ޑޮނަލްޑް ޓްރަމްޕް ކާމިޔާބު ހޯއްދެވުމާ ގުޅިގެން، ރަޝިޔާއަށް ޙަމަލާ ދިނުމަށް އެމެރިކާއިން ފޮނުވަމުންދާ ދުރު-ރާސްތާ މިސައިލްތައް ބޭނުން ކުރުމުގެ ހުއްދަ ބައިޑަން ދެއްވާފައިވެއެވެ. ޓްރަމްޕްއަކީ ރަޝިޔާ-ޔޫކްރެއިން ހަނގުރާމައާ ދެކޮޅު ބޭފުޅެކެވެ. އަދި ޔޫކްރެއިނަށް އެމެރިކާއިން ހަތިޔާރު ފޯރުކޮށްދިނުމާ ވެސް ދެކޮޅު ބޭފުޅެކެވެ.

ޖަނަވަރީ 20، 2025 ގައި ވެރިކަމާ ޙަވާލުވެ ވަޑައިގެންނެވުމަށް ފަހު، ފުރަތަމަ ދުވަހުގެ ތެރޭގައި ރަޝިޔާ-ޔޫކްރެއިން ހަނގުރާމަ ނިމުމަކަށް ގެންނަވާނެ ކަމަށް ޓްރަމްޕް ވިދާޅުވެފައިވެއެވެ.