ENGLISH

30 އޯގަސްޓު 2025

Advertisement

އެމްޕީ ޝަރީ ކަޕް 2025: ހޭންޑްބޯޅަ މުބާރާތުގެ ފައިނަލުގައި އަންގަބޫލަބަލްއާ ގޫޕްސް ސްޕޯޓްސް ކްލަބު ބައްދަލުކުރާންޖެހިއްޖެ

03 އޯގަސްޓު 2025

|

މުޙައްމަދު އަދުހަމް

ހޭންޑްބޯޅަ މުބާރާތުގައި އަންގަބޫލަބަލްއާ ކެލާ ޔޫތު ފޯރަމް ބައްދަލުކުރި މެޗުގެ ތެރެއިން.

ކެލާ ދާއިރާގެ ރައްޔިތުންގެ މަޖިލީހުގެ މެންބަރު، ޢަބްދުﷲ ޝަރީފްގެ ފަރާތުން އެ ދާއިރާގައި ހިމެނޭ ރަށްތަކަށް ޚާއްޞަކޮށް ބާއްވާ، "އެމްޕީ ޝަރީ ކަޕް 2025" ގެ ހޭންޑްބޯޅަ މުބާރާތުގައި ކެލާ ޔޫތު ފޯރަމްއާ އެއްވަރުކޮށް، އަންގަބޫލަބަލް ފައިނަލަށް ދަތުރުކޮށްފިއެވެ.

މި ނަތީޖާއާއެކު، އަންގަބޫލަބަލް އެއްވަނައިގައި އުޅެނީ ތިން މެޗުގެ ތެރެއިން ދެ މެޗު ކާމިޔާބުކޮށް، އަނެއް މެޗު އެއްވަރުކޮށްގެން ތާވަލްގެ އެއްވަނައިގައި ނިންމާލައިގެންނެވެ. ދެވަނައިގައި އޮތް ގޫޕްސް ސްޕޯޓްސް ކްލަބު ވަނީ ދެ މެޗުން މޮޅުވެފައެވެ. ތިންވަނަ އަށް ދިޔައީ ކެލާ ޔޫތު ފޯރަމް އެވެ. އެ ޓީމު މޮޅުވީ އެންމެ މެޗަކުންނެވެ. އެއް މެޗުން އެއްވަރުވިއިރު، އަނެއް މެޗުން ވަނީ ބަލިވެފައެވެ.

ފިއްލަދޫގައި ހުންނަ ގްރައުންޑްގައި މިއަދު ހަވީރު ކުޅުނު މެޗު ނިމުނީ އަންގަބޫލަބަލްއާ ކެލާ ޔޫތު ފޯރަމް 10-10 އިން އެއްވަރުވެގެންނެވެ.

މި މެޗުގެ ކުއީން އޮފް ދަ މެޗަށް ހޮވުނީ އަންގަބޫލަބަލްގެ ހަލީމަތު ހަސްނާ އެވެ. އޭނާ ވަނީ މި މެޗުގައި ހަތަރު ލަނޑުޖަހައިފައެވެ.

މި މުބާރާތަކީ، ކެލާ ދާއިރާގައި ހިމެނޭ ތިން ރަށް ކަމަށްވާ، ކެލާ އާއި ވަށަފަރު އަދި ފިއްލަދޫ އަށް ނިސްބަތްވާ އަންހެން ބޭފުޅުންނަށް ޚާއްޞަކޮށް ކުރިއަށްގެންދާ ހޭންޑްބޯޅަ މުބާރާތެކެވެ. މުޅި މުބާރާތުގެ އެއްވަނަ ޓީމަށް 50،000ރ. ގެ އަގުހުރި ފައިސާގެ އިނާމެއް ކަނޑައަޅާފައިވާއިރު، ރަނަރަޕް މަގާމަށް ވެސް 20،000ރ. ވަނީ ހުށަހަޅާފައެވެ.

މުބާރާތުގެ ފައިނަލުގައި އަންގަބޫލަބަލް ނިކުންނާނީ ގޫޕްސް ސްޕޯޓްސް ކްލަބާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ އަންނަ އަންގާރަ ދުވަހުގެ ހަވީރު 4:30 ގައެވެ.

ކިޔުންތެރިންގެ ހިޔާލު