މި އަހަރުގެ ދެވަނަ ކުއާޓާގައި ޑޮލަރުން ދައުލަތަށް ލިބުނު އާމްދަނީ 46.8 އިންސައްތަ އިތުރުވުމާއެކު ޖުމްލަ އާމްދަނީ 27 އިންސައްތަަ މަތިވެފައިވަކަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ތަފާސްހިސާބުތަކުން ދައްކައިފިއެވެ. 

މީރާއިން ކޮންމެ ކުއާޓާއެއް ނިމުމުން އާއްމުކުރާ ކުއާޓާލީ ރިޕޯޓަށް ބަލާއިރު، މި އަހަރުގެ ދެވަނަ ކުއާޓާގައި 348.58 މިލިއަން ޑޮލަރު އާމްދަނީގެ ގޮތުގައި މީރާއަށް ލިބުނެވެ. އެއީ 2024 ވަނަ އަހަރުގެ ދެވަނަ ކުއާޓާގައި ޑޮލަރުން ލިބުނު އާމްދަނީއަށްވުރެ 46.8 އިންސައްތަ އިތުރު މިންވަރެކެވެ. 

ޑޮލަރުން ލިބުނު އާމްދަނީ އިތުރުވުމުގެ މައިގަނޑު ސަބަބުތަކުގެ ތެރޭގައި މި އަހަރުގެ ދެވަނަ ކުއާޓާގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ނިމުނު އަހަރުގެ އެ މުއްދަތުގައި އައި ފަތުރުވެރިންގެ އަދަދަށްވުރެ %11.4 އިތުރުވުން ހިމެނެއެވެ. ނަތީޖާއެއްގެ ގޮތުން ފަތުރުވެރިކަމުގެ މުދަލާއި ހިދުމަތުން ނަގާ ޓެކުހުގެ ގޮތުގައި ލިބުނު އަދަދު 25.5 އިންސައްތަ އިތުރުވިއެވެ. 

އޭގެ އިތުރަށް ޓެކުސް ނެގުމާ ގުޅޭ ގަވާއިދުތަކަށް ގެނައި ބަދަލާއެކު ޑޮލަރުން އާމްދަނީ ލިބޭ މުވައްޒަފުންގެ ވިތުހޯލްޑިން ޓެކުހާއި، ނޮން-ރެޒިޓެންޓް ވިތުހޯލްޑިން ޓެކުސްގެ ގޮތުގައި ޑޮލަރުން އިތުރު އާމްދަނީ ލިބުނެވެ. އެގޮތުން މި ދެ ބާވަތުގެ ޓެކުހުގެ ގޮތުގައި 16.91 މިލިއަން ޑޮލަރު ލިބިފައިވެއެވެ. 

އަދި ގްރީން ޓެކުހުގެ ރޭޓަށް ގެނައި ބަދަލަށް ޖަނަވަރީ 1، 2025 ވަނަ ދުވަހުން ފެށިގެން އަމަލުކުރަން ފެށުމާއެކު، ގްރީން ޓެކުހުގެ ގޮތުގައި ނިމުނު އަހަރުގެ ދެވަނަ ކުއާޓާގައި ލިބުނު އާމްދަނީއަށްވުރެ އިތުރަށް 22.08 މިލިއަން ޑޮލަރު މި އަހަރުގެ ދެވަނަ ކުއާާޓާގައި ލިބުނެވެ. އެއީ 132.7 އިންސައްތައިގެ އިތުރުވުމެކެވެ. 

އެއާޕޯޓު ޓެކުސްތަކުގެ ރޭޓަށް ގެނައި ބަދަލާއި، އެއާޕޯޓުން ފުރި މީހުންގެ ނިސްބަތް 7.5 އިންސައްތައިން އިތުރުވުމާ ގުޅިގެން އެއާޕޯޓު ޓެކުސްތަކާއި ފީތަކުގެ ގޮތުގައި ލިބުނު އާމްދަނީ 21.96 މިލިއަން ޑޮލަރުން އިތުރުވިއެވެ. އެއާޕޯޓު ޑިވެލޮޕްމެންޓު ފީގެ ގޮތުގައި ލިބުނު އާމްދަނީ 55.5 އިންސައްތަ އިތުރުވިއިރު ޑިޕާޗާ ޓެކުހުގެ ގޮތުގައި ލިބުނު އާމްދަނީ 56.9 އިންސައްތަަ އިތުރުވިއެވެ. 

ޖުމްލަަ އާމްދަނީއަށް ބަލާއިރު ދެވަނަ ކުއާޓާގއި 7.45 ބިލިއަން ރުފިޔާ ލިބުނެވެ. އެއީ 2024 ގެ ދެވަނަ ކުއާޓާގައި ލިބުނު އާމްދަނީއަށްވުރެ 27 އިންސައްތަ އިތުރު މިންވަރެކެވެ. އަދި މި އަހަރު ލިބޭނެކަމަަށް ކުރިން އަންދާޒާކުރި އާމްދަނީއަށްވުރެ 6.7 އިންސައްތަ އިތުރު މިންވަރެކެވެ. 

ޓެކުސް އާމްދަނީގެ ގޮތުގައި ދެވަނަ ކުއާޓާގައި ލިބުނު 5.98 ބިލިއަން ރުފިޔާއަކީ ނިމުނު އަހަރުގެ އެ މުއްދަތުގައި ޓެކުހުން ލިބުނު އާމްދަނީއަށްވުރެ 24.3 އިންސައްތަ އިތުރު އަދަދެވެ. އަދި ޓެކުސް ނޫން ގޮތްގޮތުން މި އަހަރުގެ ދެވަނަ ކުއާޓާގައި ލިބުނު 1.46 ބިލިއަން ރުފިޔާއަކީ ނިމުނު އަހަރުގެ އެ މުއްދަތުގައި ޓެކުސް ނޫން ގޮތްގޮތުން ލިބުނު އަދަދަށްވުރެ 39.5 އިންސައްތަ އިތުރު އަދަދެކެވެ.