މާލޭން ފުރައިގެން ތ. ވޭމަންޑޫއަށް ދަތުރުކުރި ދޯންޏެއް ފަރަށް އަރައި އަޑިއަށް ދިޔައިރު، އެ ދޯނިން ދަތުރުކުރި ތިން މީހުން ސަލާމަތްކޮށްފިއެވެ. 

ދިވެހި ފުލުހުންގެ ޚިދުމަތުން މީޑިއާތަކާ ޙިއްޞާކުރި މަޢުލޫމާތުގައި ބުނީ، ވޭމަންޑޫއަށް ދަތުރުކުރި "އަލްމަޖްރާ" ދޯނި ދިއްގިރި ކައިރިން ފަރަށް އަރައި ދިޔަވެ، އަޑިއަށްދާކަމުގެ މަޢުލޫމާތު ލިބުނީ މިއަދު ފަތިހު 5:34 ހާއިރު ކަމަށެވެ. 

ފުލުހުންނަށް ލިބުނު ރިޕޯޓާ ގުޅިގެން، އެ ހާދިސާ ހިނގި ސަރަޙައްދާ އެންމެ ގާތުގައި ތިބި ވ. އަތޮޅު ފުލުހުން ވަނީ އެހީތެރިކަން ފޯރުކޮށްދީފައެވެ. އަދި، އެ ދޯނިން ދަތުރުކުރި ތިން މީހުން ހާލުގައި ޖެހިފައި ފަރުމަތީގައި ތިއްބައި ފެނިފައިވާ ކަމަށް ފުލުހުން ބުނެފައިވެއެވެ. އަދި، އެމީހުން ފުލުހުންގެ ލޯންޗަށް ނަގައި ފެލިދޫއަށް މިހާރު ވަނީ ގެންގޮސްފައެވެ.

ފުލުހުުން ބުނީ އެ ދޯނިން ދަތުރުކުރީ ދިވެއްސަކާއި ބަންގްލަދޭޝްގެ ދެމީހުން ކަމަށެވެ. 

އަލްމަޖްރާ ދޯނި ފަރަށް އަރައި އަޑިއަށްގޮސްފައި. --ފޮޓޯ: ޕޮލިސް

"ދޯނި އަޑިއަށް ދިޔައިރު، އެ ދޯނީގައި ގިނަ އަދަދެއްގެ ޕީވީސީ ފިލާ އަދި އެބާވަތުގެ ގިނަ ސާމާނު ހުންނާނެ ކަމަށް އެ މީހުން މައުލޫމާތު ދީފައިވޭ. ދޯނީގައި ހުރި ތަކެތި އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް ދަންނަވަން،" ފުލުހުން އާއްމުކުރި މަޢުލޫމާތުގައި އިތުރަށް ބުނެފައިވެއެވެ. 

ހުޅަނގު މޫސުމާއެކު ރާއްޖެއަށް މިދުވަސްވަރު މޫސުން ގޯހެވެ. މޫސުމާ ބެހޭ ޤައުމީ އިދާރާއިން މިއަދު ބުނީ ކުރިއަށް އޮތް ހަތަރު ދުވަހު ވައިގަދަވެ، ކަނޑުތައް ވެސް ގަދަވާނެ ކަމަށެވެ. 

މޫސުން ރަނގަޅުވާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައި ވަނީ ބުރާސްފަތި ދުވަހުން ފެށިގެންނެވެ. މޫސުން ގޯސްވުމުގެ ސަބަބުން ކަނޑުމަތީގެ ބައެއް ހާދިސާތައް ހިނގައިގެން ސިފައިންނާއި ފުލުހުން ވަނީ ހަރަކާތްތެރިވެފައެވެ.