އާރްޓީއެލް ފެރީގައި ބޭސްފަރުވާއަށް ކުރާ ދަތުރުތައް ހިލޭ ކުރެވޭނެ އިންތިޒާމު ހަމަޖެއްސުމަށް ނިންމާފައިވާކަން ދަތުރުފަތުރާއި ވައިގެ އުދުހުންތަކާ ބެހޭ ވުޒާރާއިން ހާމަކޮށްފިއެވެ. 

ދައުލަތުގެ މީޑިޔާ ޕީއެސްއެމްއަށް ދެއްވި ބަސްދީގަތުމެއްގައި އެ ވުޒާރާގެ ނައިބުވަޒީރު އިބްރާހީމް ޔާސިރު ވިދާޅުވީ ބޮޑެތި ބަލިތަކަށް ދާއިމީ ގޮތެއްގައި ފަރުވާ ހޯދާ މީހުންނަށް ސިއްހީ އެކިއެކި ހިދުމަތްތައް ހޯދުމަށް ހިލޭ އާރްޓީއެލް ފެރީގައި ދަތުރުކުރެވޭނެ އިންތިޒާމު ވަރަށް އަވަހަށް ހަމަޖެހިގެންދާނެ ކަމަށެވެ. 

ޔާސިރު ވިދާޅުވި ގޮތުގައި ބޭސްފަރުވާ ހޯދުމަށް އާރްޓީއެލް ފެރީގައި ކުރާ ދަތުރުތައް ހިލޭ ކުރެވޭނެ ގޮތް ހަމަޖެއްސުމުގެ މަސައްކަތްކުރާނީ އެ ހިދުމަތް ފޯރުކޮށްދޭ އެމްޓީސީސީއާއި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގުޅިގެންނެވެ. 

އޭނާ ވިދާޅުވީ އެ ހިދުމަަތް ފޯރުކޮށްދޭން ފެށުމަށް ފުޅާ ދާއިރާއެއްގައި މަޝްވަރާކުރެވިފައިވާ ކަމަަށެވެ. އަދި ހިދުމަތް ފެށުމާ ގާތަށް މިހާރު ދެވިފައިވާކަން ފާހަގަކުރައްވަމުން އޭނާ ވިދާޅުވީ އެ ހިދުމަތް ދިނުމަށް ބީއެމްއެލްއިން ހާއްސަ ކާޑެއް ބަލިމީހުންނަށް އެންސްޕާ މެދުވެރިކޮށް ފޯރުކޮށްދޭނެ ކަމަށެވެ. އެ ކާޑު ބޭނުންކޮށްގެން ބަލިމީހާއާއި އެހީތެރިޔާއަށް ހިލޭ އާރްޓީއެލް ފެރީގައި ދަތުރުކުރެވޭނެ ކަމަށެވެ. 

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އިސްނެންގެވުމަށް ސަރުކާރުން އަންނަނީ މި އަހަރު ރާއްޖޭގެ ހުރިހާ އަތޮޅެއްގައި އާރްޓީއެލް ހިދުމަަތް ފެށުމަށް މަސައްކަތް ކުރަމުންނެވެ. އެ މަސައްކަތުގެ ތެރެއިން ޖޫން މަހު ރ. އަތޮޅުގައި އަދި ހުލައި މަހު ބ.އަތޮޅުގައި ހިދުމަތް ފަށާފައިވެއެވެ. 

އެ ހިދުމަތް ފުޅާކުރުމަށް 100 މިލިއަން ޑޮލަރުގެ ހިލޭ އެހީއެއް އިންޑިޔާ ސަރުކާރުން ހަމަޖައްސައިދީފައިވެއެވެ. އެ ފައިސާ ބޭނުންކޮށްގެން 12 ހަލުއި ފެރީ ބަނުމަށް ސަރުކާރުން ނިންމާފައިވެއެވެ.