ކައުންޓަރ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މާލޭގައި ހިންގި އޮޕަރޭޝަނެއްގައި ބަނގުރަލާއި މަސްތުވާތަކެތި އަތުލައިގަނެ، 10 މީހުން ހައްޔަރުކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

ދިވެހި ފުލުހުންގެ ޚިދުމަތުން މިއަދު އާއްމުކުރި މަޢުލޫމާތުގައި ބުނީ، ޖުލައި 31 ވަނަ ދުވަހު ހިންގި އޮޕަރޭޝަނުގައި 10 މީހުން ހައްޔަރުކޮށް އެމީހުންނާ ގުޅޭ ދެގެއެއް ބަލައި ފާސްކުރި ކަމަށެވެ. މާލޭގެ ދެގެ ބަލައި ފާސްކުރިއިރު، ތިންފުޅި ބަނގުރާ އަދި މަސްތުވާތަކެތި ކަމަށް ބެލެވޭ ތަކެތި ފެނިފައިވާކަމަށް ފުލުހުން ބުނެފައިވެއެވެ. ފެނުނު މަސްތުވާތަކެތީގެ ބަރުދަނުގައި 66.92 ގްރާމް ހުރިކަމަށް ފުލުހުން ބުނެފައިވެއެވެ. 

ހައްޔަރުކުރުމަށް ފަހު އެމީހުންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ޝަރުތު ކަނޑައަޅައި 7 މީހަކު ވަނީ ދޫކޮށްލާފައެވެ. ބާކީ ތިން މީހުން ވަނީ ހަތް ދުވަހަށް ބަންދުކުރަން އަމުރުކޮށްފައެވެ. 

މައްސަލައިގައި ހަތް ދުވަހަށް ބަންދުކުރަން ކޯޓުން ނިންމީ، ހދ. ނޭކުރެންދޫ / ފްލާވަރހައުސް، ޢާއިޝަތު ފައިޚާ ޠާހާ (19އ) އާއި ނ. މަގޫދޫ / ސާމިޔާނާ، އަކްރަމް މުޙައްމަދު (28އ) ފަސްދުވަހަށް އަދި ސ. ހުޅުދޫ / ރޯޝަނީމާގެ، އަޙްމަދު ތައިސީރު (27އ) އެވެ. 

ޖުލައިި 31 ވަނަ ދުވަހު ހިންގި އެހެން އޮޕަރޭޝަނެއްގައި، ލ. މާމެންދޫއަށް ދަތުުރުކުރި ބޯޓަކުން އެ ރަށަށް މަސްތުވާތަކެތި ގެންދާކަމަށް ކައުންޓަރ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަަނުގައި މަސްތުވާތަކެތި ހޯދައި ފުލުހުންގެ ބެލުމުގެދަށަށް ވަނީ ގެންގޮސްފައެވެ. 

އެ އޮޕަރޭޝަނުގައި ބޯޓު ބަލައި ފާސްކުރިއިރު، މަސްތުވާތަކެތިކަމަށް ބެލެވޭ އެއްޗެއްހުރި 115 ސެލޯފިންކޮޅު ފެނިފައިވެއެވެ. އެ ބޯޓުގައި ހުރި ފޮށިގަނޑެއްގެ ތެރެއިން ފެނުނު މި ތަކެތީގެ ވަގުތީ ބަރުދަނަކީ 82 ގުރާމެވެ.

މަސްތުވާތަކެއްޗާއި ބަނގުރަލުގެ މައްސަލަތަކުގައި ފުލުހުންގެ ބެލުމުގެ ދަށަށް ގެންނަ ތަކެތީގެ ތެރެއިން، ދ. ކުޑަހުވަދޫ ޕޮލިސް ސްޓޭޝަނުގެ ބެލުމުގެދަށުގައި ހުރި ބަނގުރާ ނައްތާލާފައިވާކަމަށް ދިވެހި ފުލުހުންގެ ޚިދުމަތުން މިއަދު ވަނީ ބުނެފައެވެ. އެގޮތުން ޖުލައި 31 ވަނަ ދުވަހު ނައްތާލާފައިވަނީ 299 ފުޅި ބަނގުރަލާއި 193 ދަޅު ބިޔަރެވެ.