ހައިކޯޓުގެ ފަނޑިޔާރުކަމަށް އައްޔަންކުރުމަށް ޖުޑީޝަލް ސާވިސަސް ކޮމިޝަން (ޖޭއެސްސީ)އިން ނިންމާފައިވާ މުހައްމަދު ޝަހީދު ނަން އަނބުރާ ގެންދަވަން ނިންމެވިކަން ޖޭއެސްސީއަށް އަންގަވައިފިއެވެ. 

ޖޭއެސްސީގެ ރައީސް ހުސައިން ރިޒާ އާދަމަށް ފޮނުއްވި ސިޓީއެއްގައި ޝަހީދުވަނީ އޭނާ ހައިކޯޓުގެ ފަނޑިޔާރުކަމަށް ކުރިމަތިލައްވައި ހުށަހެޅުއްވި އެޕްލިކޭޝަަން ބާތިލުކޮށްދިނުމަށް އެދިވަޑައިގެންފައެވެ. އަދި އެގޮތަށް އެދިވަޑައިގަތީ އޭނާއަކީ މިހާރުވެސް ސިޔާސީ މީހެއްގެ ގޮތުގައި ސިފަކުރާތީ، ފަނޑިޔާރުކަމަށް އޭނާ އައްޔަންކޮށްފިނަމަ ފަނޑިޔާރުންގެ ނަޒާހަތްތެރިކަމާމެދު އާއްމުންގެ މެދުގައި ޝައްކު އުފެދިދާނެތީއެވެ. 

ޝަހީދު ވިދާޅުވި ގޮތުގައި އޭނާ ނަން އަނބުރާ ގެންދަވަނީ ޝަރުއީ ދާއިރާގެ މުސްތަގިއްލުކަން ހިމާޔަތްކުރެއްވުމަށެވެ. އަދި ސިޔާސީ މަގާމެއްގައި ހުންނެވުމަށްފަހު، އެ މަގާމުން އިސްތިއުފާދެއްވައި ހައިކޯޓުގެ ފަނޑިޔާރުކަމަށް ކުރިމަތިލެއްވީ ސިޔާސީ ކަންކަމާ ދުރަށް ވަޑައިގަތުމަށް ކަމުގައި ޝަހީދު ވިދާޅުވިއެވެ. \

ހައިކޯޓުގެ ފަނޑިޔާރުކަމުގެ ޝަރުތު އޭނާގެ ކިބައިގައި ފުރިހަމަނުވާކަމަށް ބައެއް ފަރާތްތަކުން ދައްކާ ވާހަކަތަކަށް ރައްދުދެއްވައި ޝަހީދު ވިދާޅުވެފައިވަނީ އޭނާއަކީ ގާނޫނީ ވަކީލެއްގެ ގޮތުގައި ފަސް އަހަރަށްވުރެ ގިނަ ދުވަހު މަސައްކަތް ކުރައްވާފަައިވާ ބޭފުޅަކަށްވާތީ ހައިކޯޓުގެ ފަނޑިޔާރުކަމުގެ ޝަރުތު އޭނާގެ ކިބައިގަ ފުރިހަމަވާނެއެވެ. 

މިރޭ ޝަަހީދާއި ސިވިލް ކޯޓުގެ ކުރީގެ ގާޒީ އަބްްދުﷲ ޖަލީލު މޫސާ އައްޔަންކުރުމަށް ބާއްވަން ނިންމާފައި އޮތް ރަސްމިއްޔާތުގައި ބައިވެރިވެވަޑައިނުގަންނަވާނެކަން ޝަހީދު ޖޭއެސްސީއަށް އެންގެވިއެވެ. އަދި ހައިކޯޓުގެ ފަނޑިޔާރުކަމާ ހަވާލުވެވަޑައިގަތުމަށް އުޒުރުވެރިވެވަޑައިގަންނަވާކަމަށްވެސް ވިދާޅުވިއެވެ. 

ޝަހީދު އިތުރަށް ވިދާޅުވީ ސުޕްރީމް ކޯޓުގެ ކުރީގެ ފަނޑިޔާރު ހުސްނުއް ސުއޫދު ފަނޑިޔާރުކަމަށް އައްޔަންކުރުމުގެ ކުރިން އެއިރުގެ ރައީސް އުފެއްދެވި ރިޔާސީ ކޮމިޝަނެއްގެ ރައީސްކަމުގައި ހުންނެވިކަމަށެވެ. އަދި އެ މަގާމަކީ ސިޔާސީ މަގާމެއް ކަމުގައިވެސް ޝަހީދު ވިދާޅުވިއެވެ.