އަންނަ ބުރާސްފަތިދުވަހާ ހަމައަށް ރާއްޖޭގެ އެކި ކަންކޮޅުތަކަށް މޫސުން ގޯސްވެ، ވިއްސާރަވާނެ ކަމުގައި މޫސުމާ ބެހޭ ގައުމީ އިދާރާއިން ލަފާކޮށްފިއެވެ. 

އެ އިދާރާއިން ލަފާކުރާ ގޮތުގައި ކުރިއަށް އޮތް 24 ގަޑިއިރު މެދުރާއްޖެތެރެއާއި އތުރުރުގެ އަތޮޅުތަކަށް މޫސުން ގޯސްވާނެއެވެ. އެގޮތުން ރާއްޖޭގެ ބޮޑު ބަޔަކަަަަށް ވިއްސާރަވެ ވައިގަދަވާނެ ކަމުގައި ލަފާކުރެވޭތީ އެ އިދާރާއިން މިއަދު ހުދު ސަމާލު ނެރެފައިވެއެވެ. 

ހުދު ސަމާލު ނެރެފައިވަނީ ހެނދުނު 6:15 އިން ފެށިގެން މެންދުރު 12:00 އާ ހަމައަށް ހއ.އަތޮޅުން ފެށިގެން ވ.އަތޮޅާ ހަމައަށެވެ. އެ ވަގުތުތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހޭނެކަމަށާއި، ވިލާގަނޑުގައި ގަޑިއަކު 45 މޭލު ބާރުމިނުގައި ވައިޖެހި ކަނޑުތައް ގަދަވާނެ ކަަމުގައި އެ އިދާރާއިން ލަފާކޮށްފައިވެއެވެ. 

ރާއްޖެއަށް ކުރަމުންދާ ވިއްސާރާގައި ފާއިތުވި 24 ގަޑިއިރު އެންމެ ބޯކޮށް ވާރޭވެހުނީ ބ.ދަރަވަންދޫއަށެވެ. އެރަށަށް 20.0 މިލިލީޓަރުގެ ވާރޭވެހުނުކަމަށް މެޓު އޮފީހުން މައުލޫމާތު ދިނެވެ. 

ކުރިއަށް އޮތް 24 ގަޑިއިރު ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެކަމށާއި އުތުރުގެ ބައެއް ރަށްތަކަށް ބޯކޮށް ވާރޭވެހުމަކީ އެކަށީގެންވާ ކަމެއް ކަމުގައި އެ އިދާރާއިން ބުނެފައިވެއެވެ. އަދި މެދުރާއްޖެތެރޭ އަތޮޅުތަކަށް ހުޅަނގާއި ހުޅަަނގު އުތުރު ގަޑިއަކު 13 މޭލާައި 23 މޭލަ ދެމެދުގައި ބާރުމިނުގައި ވައިޖެހޭނެކަމަށާއި، ދެކުނުގެ އަތޮޅުތަކަށް ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެކަމަށްވެސް އެ އިދާރާއިން ލަފާކުރެއެވެ. 

އަދި ދެކުނުގެ އަތޮޅުތަކަށް ވިލާގަނޑުގައި ގަދަވާނެކަމަށާއި އެ އަތޮޅުތަކުގެ ކަނޑުތައް އާދައިގެ ވަރަކަަށް ގަދަވާނެ ކަމުގައި ލަފާކުރާއިރު، އުތުރާއި މެދުރާއްޖެތެރޭގެ އަތޮޅުތަކުގެ ކަނޑުތައް ގަދަވާނެ ކަމަށް މެޓުން ބުނެއެވެ. 

މެޓު އޮފީހުން ބުނި ގޮތުގައި މިހާރު ކުރާ ވިއްސާރަ ނިމުމަކަށް އައިސް މޫސުން އަލިވާނެ ކަމުގައި ބެލެވެނީ އަންނަ ބުރާސްފަތިދުވަހުއެވެ. މިހާރު ކުރާ ވިއްސާރައަކީ ހުޅަނގު މޫސުމުގެ ވިއްސާރަކަމަށްވެސް އެ އިދާރާއިން ބުނެފައިވެއެވެ. 

މިދުވަސްވަރު މޫސުން ގޯސްވެ، ކަނޑުތައް ގަދަވެފައިވާތީ، ދަތުރުފަތުރުކުރުމުގައި ސަމާލުވުމަށް އެ އިދާރާއިން އެދެއެވެ. އަދި މޫސުމަށް ބަލައިގެން ލިބިދާނެ ގެއްލުން ކުޑަކުރުމަށް އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށްވެސް އެ އިދާރާއިލް އިލްތިމާސްކުރެއެވެ.