ދައުލަތުގެ ދަރަނި އަދާކުރުމުގައި އެހީތެރިވުމަށް ފައިސާ ރައްކާކުރުމަށް އުފެއްދި ސޮވެރިން ޑިވެލޮޕްމެންޓު ފަންޑަށް ޖަމާކުރި ފައިސާގެ އަދަދު 13.5 އިންސައްތަ އިތުރުވެފައިވާކަން މާލީ ހިސާބުތަކުން ދައްކައިފިއެވެ. 

ފިނޭންސް މިނިސްޓްރީން ކޮންމެ ހަފުތާއަކު އެއްފަހަރު އާއްމުކުރާ މާލީ ހިސާބުތަކަށް ބަލާއިރު މި އަހަރުގެ ޖަނަވަރީ އެއްވަނަ ދުވަހުން ފެށިގެން ޖުލައި 17 ވަނަ ދުވަހުގެ ނިޔަލަށް ސޮވެރިން ޑިވެލޮޕްމެންޓު ފަންޑަށް 1.07 ބިލިއަން ރުފިޔާ ޖަމާކޮށްފަައިވެއެވެ. ފާއިތުވި އަހަރުގެ އެ މުއްދަތުގައި އެސްޑީއެފަށް ޖަމާކޮށްފައިވަނީ 728.7 މިލިއަން ރުފިޔާއެވެ. 

އެހެންކަމުން މި އަހަރުގެ މިހާތަނަށް އެސްޑީއެފްއަށް ޖަމާކުރި ފައިސާގެ އަދަދު 13.5 އިންސައްތައިން އިތުރުވެފައިވެއެވެ. 

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު އެސްޑީއެފްގައި ޑޮލަރުން ހުރީ އެންމެ 35 އިންސައްތަ ފައިސާއެވެ. މި އަހަރު އޮޑިޓާ ޖެނެރަލްގެ އޮފީހުން ނެރުނު އެސްޑީއެފް އޮޑިޓު ރިޕޯޓެއްގައި ފާހަގަކުރި ގޮތުގައި 2020 ވަނަ އަހަރާއި 2021 ވަނަ އަހަރު އެސްޑީއެފްގައި ޑޮލަރުން ރައްކާކޮށްފައި ހުރި ހުރިހާ ފައިސާއެއް މާރުކުރިއެވެ. 

2018 ވަނަ އަހަރު ނިމުނުއިރު އެސްޑީއެފްގައި ހުރި ފައިސާގެ 94 އިންސައްތަ ޑޮލަރުން ހުރި ނަމަވެސް 2019 ވަނަ އަހަރު އެ އަދަދު 30 އިންސައްތައަށް ދަށްވިއެވެ. އެއށްފަހު 2021 ގައި އެ އަދަދު 15 އިންސައްތައަށް ވެއްޓުނުކަމަށް އޮޑިޓު ރިޕޯޓުގައި ބުނެފައިވެއެވެ. 

ރައީސް ޑރ.މުއިއްޒު ވެރިކަމާ ހަވާލުވެވަޑައިގަތުމަށްފަހު ސަރުކާރުން އަންނަނީ އެސްޑީއެފްއަށް ޑޮލަރުން ޖަމާކުރާ މިންވަރު އިތުރުކޮށް މި އަހަރާއި އަންނަ އަހަރު ދައްކަންޖެހޭ ބޭރު ފައިސާގެ ބޮޑެތި ދަރަނިތައް އަދާކުރުމުގެ ގާބިލުކަން އިތުރުކުރަމުންނެވެ. 

ރާއްޖޭގެ ކްރެޑިޓް ރޭޓިން ހަދާ ދެ އެޖެންސީކަމަށްވާ މޫޑީސްއާއި ފިޗްއިން ރާއްޖޭގެ ކްރެޑިޓު ރޭޓިން އިތުރަށް ދަަށްނުކުރަން ނިންމި ސަބަބުތަކުގެ ތެރޭގައި ބޭރު ފައިސާގެ ރަސްމީ ރިޒާވްގެ އިތުުރަށް ފިސްކަލް ރިޒާވްއެއްގެ ގޮތުގައި ބަލާ އެސްޑީއެފްގެ ހާލަތު ރަނގަޅުވުން ހިމެނެއެވެ. 

2017 ވަނަ އަހަރު އެސްޑީއެފް އުފެއްދީ ވަކި މުއްދަތުތަކުގައި އަދާކުރަންޖެހޭ ދަރަނި އަދާކުރުމާއެކު، ރާއްޖޭގެ ކްރެޑިޓު ރޭޓިން އެއް ހަމައެއްގައި ހިފަހައްޓައި ދަތި ވަގުތުތަކުގައި ދަރަނި އަދާކުރުން ފަސޭހަކޮށް، މުއައްސަސީ ފެންވަރެއްގައި ފައިސާ ރައްކާކުރެވޭނެ އަދި ޖީލުތަކުގެ މެދުގައި އަދަލުވެރިކަން ގާއިމުކުރުމުގެ ބޭނުމުގައެވެ.