މި އަހަރުގެ ޖުލައި މަހުގެ 17 ވަނަ ދުވަހުގެ ނިޔަލަށް ދައުލަތުގެ ހަރަދުތައް 17 އިންސައްތައިން ދަށްކުރެވި ބަޖެޓު ޑެފިސިޓެއް ނެތްކަން މާލީ ހިސާބުތަަކުން ދައްކައިފިއެވެ. 

ފިނޭންސް މިނިސްޓްރީން ކޮންމެ ހަފުތާއަކު އެއްފަހަރާ އާއްމުކުރާ މާލީ ހިސާބުތަކަށް ބަލާއިރު ފާއިތުވި ޖުލައި މަހުގެ 17 ވަނަ ދުވަހުގެ ނިޔަލަށް 20.5 ބިލިއަން ރުފިޔާގެ އާމްދަނީއެއް ލިބުނެވެ. ނިމުނު އަހަރުގެ އެ މުއްދަތުގައި ލިބުނީ 19 ބިލިއަން ރުފިޔާގެ އާމްދަނީއެކެވެ. 

ނިމުނު އަހަރު ޓެކުހުގެ ގޮތުގައި ލިބުނީ 14.9 ބިލިއަން ރުފިޔާއެވެ. މި އަހަރު 15.6 ބިލިއަން ރުފިޔާ ޓެކުހުގެ ގޮތުގައި ލިބުނެވެ. ޓެކުސް ނޫން ގޮތްގޮތުން ނިމުނު އަހަރު 3.6 ބިލިއަން ރުފިޔާ ލިބުނުއިރު މި އަހަރު 4.6 ބިލިއަން ރުފިޔާ ލިބުނެވެ. 

މި ހިސާބުތަކަށް ބަލާއިރު މި އަހަރު ޖުމްލަ އާމްދަނީވަނީ ފާއިތުވި އަހަރާ އަޅާބަލާއިރު %8 އިން އިތުރުވެފައެވެ. އަދި ޓެކުހުގެ ގޮތުގައި ލިބުނު އާމްްދަނީ 4.5 އިންސައްތައިން އިތުރުވިއިރު ޓެކުސް ނޫން ގޮތްގޮތުން ލިބުނު އާމްދަނީ 27.4 އިންސަައްތަ އިތުރުވެފައިވެއެވެ. 

އާމްދަނީ އެކަށީގެންވާ މިންވަރަކަށް އިތުރުވިއިރު ސަރުކާރުން މިހާރު އަޅަމުންދާ ފިޔަވަޅުތަކާއެކު ދައުލަތުގެ ޖުމްލަ ހަރަދުވަނީ ވަރަށް ބޮޑަށް ކުޑަވެފައެވެ. އެގޮތުން ނިމުނު އަހަރުގެ ޖުލައި 17 ވަނަ ދުވަހުގެ ނިޔަލަަށް 23.6 ބިލިއަން ރުފިޔާ ހަރަދުވި ނަމަވެސް މި އަހަރުގެ އެ މުއްދަތުގައި ހަރަދުވެފައިވަނީ 19.4 ބިލިއަން ރުފިޔާއެވެ. އެއީ ގާތްގަަނޑަކަަށް 17.7 އިންސައްތައިގެ ދަށްވުމެކެވެ. 

ދައުލަތުގެ ހަރަދުތަކަށް ބަލާއިރު ލޯނު އަދާކުރުމަށް 3.2 ބިލިއަން ރުފިޔާ ހަރަދުވިއެވެ. އަދި ފައިނޭންސްކުރުމާއި އިންޓަރެސްޓު ދެއްކުމަށް އިތުރު 2.4 ބިލިއަން ރުފިޔާ ހަރަދުވިއެވެ. އެހެންކަމުން ދަރަނި އަދާކުރުމުގެ ޖުމްލަ ހަރަދަށް 5.6 ބިލިއަން ރުފިޔާ ހަރަދުވެފައިވެއެވެ. 

ނިމުނު އަހަރު ލޯނު އަދާކުރުމަށް ހަރަދުވި 1.2 ބިލިއަން ރުފިޔާއާއި ފައިނޭންސްކުރުމާއި އިންޓަރެސްޓު އަދާކުރުމަށް ހޭދަަވި 2.4 ބިލިއަން ރުފިޔާއާއެކު ދަރަނި އަދާކުރުމަށް ހަރަދުވި 3.7 ބިލިއަން ރުފިޔާއަށްވުރެ މި އަހަރު ދަރަނި އަދާކުރުމަށް ހަރަދުކުރި މިންވަރު 52 އިންސައްތައާ ގާތްކުރާ މިންވަރަކަށް އިތުރުވިއެވެ. 

ދަރަނި އަދާކުރުމުގެ ހަރަދުތައް އިތުރުވި ނަމަވެސް ޖުލައި 17 ގެ ނިޔަލަށް ބަޖެޓު ޑެފިސިޓުވެފައިނުވެއެވެ. އެ މުއްދަތުގައި 1.05 ބިލިއަން ރުފިޔާއިން ބަޖެޓު އަރަނިވެފައިވެއެވެ. އެހެންކަމުން އެ މުއްދަތުގައި ބަޖެޓުގެ ހަރަދުތައް ފޫބެއްދުމަށް ދަރަންޏަށް ފައިސާ ނަގަންޖެހިފައިނުވެއެވެ.