ރާއްޖޭގެ ކަނޑޫފާތަކުގައި ހެދޭ ބަރު ގަހުގެ އޮށްތަކެއް ތަހުލީލުތަކެއް ކުރުމަށް ޖައްވަށް ފޮނުވައިފި އެވެ.

މޯލްޑިވްސް ސްޕޭސް ރީސާޗް އޯގަނައިޒޭޝަން (އެމްއެސްއާރްއޯ) އިން ބުނި ގޮތުގައި "މެންގްރޯވްސް އިން ސްޕޭސް މިޝަން"، އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ކާމިޔާބުކަމާއެކު އިއްޔެ ވަނީ ފޮނުވައިފައެވެ.

ޖައްވަށް ފޮނުވައިފައިވާ އޮށްތައް ނެގީ ހދ. ކުޅުދުއްފުއްޓާއި ނ. ކެނދިކުޅުދޫ ކުޅީގައި ހެދޭ ބަރު ގަހުންނެވެ.

އެމްއެސްއާރްއޯއިން ބުނި ގޮތުގައި އެ އޮށްތައް ނެގީ ޖަޒީރާ ގައުމުތަކުގެ ގޮނޑުދޮށުގެ ތިމާވެށީގެ ނިޒާމާއި މޫސުމަށް އަންނަ ބަދަލުތަކާ އޮންނަ ގުޅުން ދިރާސާ ކުރުމަށެވެ.

ރާއްޖޭގެ އިތުރުން 11 ގައުމެއްގައި ހެދޭ ގަސްގަހާގެހީގެ އޮށްތައް ޖައްވަށް ފޮނުވާނެ އެވެ. އެ ގައުމުތަކަކީ، އިންޑިއާ، ޕާކިސްތާން، އާޖެންޓީނާ، ބްރެޒިލް، އެމެރިކާ، ކޮސްޓަރީކާ، ގުއަޓަމާލާ، ނައިޖީރިއާ، އަރްމޭނިޔާ އަދި މިސްރެވެ.

މި މިޝަންގެ ދަށުން، ޚާއްސަ ހާލަތްތަކުގައި މި އޮށްތަކަށް އަންނަ ބަދަލުތައް ދިރާސާކުރާނެ އެވެ. އެގޮތުން ޖާޒުބީ އަސަރު ކުޑަ ހާލަތްތަކުގައި ޖީންގެ ހަރަކާތްތެރިކަން ފެށުމާއި، އަދި މެޓަބޮލިކް ޕާތުވޭ ނުވަތަ އާދައިގެ މޮލިކިއުލްތައް ވަކި ކަހަލަ އުފެއްދުމަކަށް ބަދަލުވާ ގޮތް ފަދަ ކަންތައްތައް ބަލާނެ އެވެ.

ޖައްވަށް ފޮނުވާލި އޮށްތައް އަލުން ދުނިޔެއަށް ގެނެސް އެ ތަކެއްޗަށް އައިސްފައިވާ ބަދަލުތައް ދިރާސާ ކުރާނެ އެވެ.

އެމްއެސްއާރްއޯ އިން ބުނީ، އެ އޮށްތައް ޖައްވަށް ފޮނުވައިގެން ކުރިއަށް ގެންދާ މިޝަންގެ ސަބަބުން މިހާރަށް ވުރެ ހަރުދަނާ އަދި ދެމެހެއްޓެނިވި ގޮތެއްގައި ދަނޑުވެރިކަމާ ބެހޭ ދިރާސާތަކަށް އެހީތެރިކަން ފޯރުކޮށްދެވޭނެ ކަމަށެވެ.