މި އަހަރުގެ ފުރަތަމަ ހަ މަސްދުވަހު އެކްސްޕޯޓުކުރި މިންވަރު ނިމުނު އަހަރާ އަޅާބަލާއިރު 12.2 އިންސައްތައިން އިތުރުވެފައިވާކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (މީރާ)ގެ ތަފާސްހިސާބުތަކުން ދައްކައިފިއެވެ. 

މީރާއިން އާއްމުކޮށްފައިވާ ތަފާސްހިސާބުތަކަށް ބަލާއިރު މި އަހަރުގެ ޖަނަވަރީން ފެށިގެން ޖޫން މަހުގެ ނިޔަލަށް 235.8 މިލިއަން ޑޮލަރުގެ މުދާ ރާއްޖެއިން އެކްސްޕޯޓުކޮށްފައިވެއެވެ. ނިމުނު އަހަރުގެ އެ މުއްދަތުގައި ރާއްޖެއިން އެކްސްޕޯޓުކުރީ 210.1 މިލިއަން ޑޮލަރުގެ މުދަލެވެ. އެހެންކަމުން މި އަހަރު އެކްސްޕޯޓުކުރި މިންވަރު 12.2 އިންސައްތައިން އިިތުރުވެފައިވެއެވެ. 

އެކްސްޕޯޓަށް ބަލާއިރު ދާހިލީ އުފެއްދުންތައް އެކްސްޕޯޓުކުރި މިންވަރު ވަރަށް ބޮޑަށް އިތުރުވިކަން ފާހަގަކުރެވެއެވެ. ރާއްޖޭގެ އުފެއްދުންތައް އެކްސްޕޯޓުކުރި މިންވަރަށް ބަލާއިރު މި އަހަރުގެ ފުރަތަމަ ހަ މަހު 79.4 މިލިއަން ޑޮލަރުގެ ދިވެހި އުފެއްދުން ބޭރުކޮށްފައިވެއެވެ. ނިމުނު އަހަރުގެ އެ މުއްދަތުގައި އެކްސްޕޯޓުކޮށްފައިވަނީ 57.1 މިލިއަން ޑޮލަރުގެ ދިވެހި އުފެއްދުމެވެ. 

އެހެންކަމުން ނިމުނު އަހަރާ އަޅާބަލާއިރު މި އަހަރު ދިވެހި އުފެއްދުންތައް އެކްސްޕޯޓުކުރި މިންވަރު 39.0 އިންސައްތަ އިތުރުވެފައިވެއެވެ. 

ދާހިލީ އުފެއްދުންތަކުގެ އެކްސްޕޯޓަށް ބަަލާއިރު އެންމެ ގިނައިން އެކްސްޕޯޓުކޮށްފައިވަނީ މަހާއި މަހުގެ އުފެއްދުންތަކެވެ. އެގޮތުން ނިމުނު އަހަރު 52 މިލިއަން ޑޮލަރުގެ މަހާއި މަހުގެ އުފެއްދުންތައް އެކްސްޕޯޓުކޮށްފައިވާއިރު މި އަހަރު 74.6 މިލިއަން ޑޮލަރުގެ މަހާއި މަހުގެ އުފެއްދުންތައް އެކްސްޕޯޓުކޮށްފައިވެއެވެ. އެއީ 43.4 އިންސައްތައިގެ އިތުރުވުމެކެވެ. 

މި އަހަރުގެ މިހާތަނަށް ރާއްޖެއިން އެންމެ ގިނައިން އެކްސްޕޯޓުކުރި ގައުމަކީ ތާޒާ އަދި ގަނޑުކުރި ކަނޑުމަސް އެންމެ ގިނައިން ބޭރުކުރާ ގައުމުކަމަށްވާ ތައިލެންޑެވެ. އެގައުމަށް 45.3 މިލިއަން ޑޮލަރުގެ މުދާ އެކްސްޕޯޓުކޮށްފައިވެއެވެ. ދެން އެންމެ ގިނައިން މުދާ އެކްސްޕޯޓުކުރި ގައުމަކީ އިނގިރޭސިވިލާތެވެ. އެ ގައުމަށް 13.9 މިލިއަން ޑޮލަރުގެ މުދާ އެކްސްޕޯޓުކުރިއެވެ. 

ނިމުނު އަހަރާ އަޅާބަަލާއިރު ތައިލެންޑަށް އެކްސްޕޯޓުކުރި މިންވަރު 81.4 އިންސައްތަ އިތުރެވެ. އަދި އިނގިރޭސިވިލާތަށް އެކްސްޕޯޓުކުރި މިންވަރު 33.2 އިންސައްތައިން އިތުރުވެފައިވާކަން ތަފާސްހިސާބުތަކުން ދައްކައެވެ.