ENGLISH

01 ސެޕްޓެމްބަރު 2025

Advertisement

ތުހުމަތުތަކަށް ޝުޖާގެ ރައްދު؛ ތިން ވެރިކަމުގައިވެސް ބިޑުތައް ކާމިޔާބުކުރީ އުސޫލުތަކުގެ ތެރެއިން

03 އޯގަސްޓު 2025

|

ޝިފްޒާން އަޙްމަދު

ބާރަށު ދާއިރާގެ މެންބަރު އިބްރާހީމް ޝުޖާ

އުސޫލުތަކާ ހިލާފަށް ބާރަށު ދާއިރާގެ މަޖިލިސް މެންބަރު އިބްރާހީމް ޝުޖާއުގެ ކުންފުންޏަަކަށް ނާޖައިޒު މަންފާ ލިބޭ ގޮތަށް ހިންގާފައިވާ މުއާމަލާތްތަކަކާ ގުޅޭ ގޮތުން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)އިން ތައްޔާރުކޮށްފައިވާ ރިޕޯޓެއް ކަމުގައި ބުނެ އާއްމުކޮށްފައިވާ ލިޔުމެއްގައި ހިމެނޭ ތުހުމަތުތަކަށް ޝުޖާ ރައްދުދެއްވައިފިއެވެ. 

އެފައައިޔޫން ތައްޔާރުކުރި ރިޕޯޓެއްކަމަށް ބުނެ ސޯޝަލް މީޑިޔާގައި ފަތުރަމުންދާ ރިޕޯޓަަކީ ސައްހަ ރިޕޯޓެއްކަން ނުވަތަ ނޫންކަން އޭނާއަށް އެނގިވަޑައިނުގަންނަވާކަމަށާއި، އެ ރިޕޯޓުގައި ހުރި ތުހުމަތުތައް އޭނާގެ ވިޔަފާރިއަކާމެދު ކުރެވިފައިވާކަަން އެއްވެސް އިދާރާއަކުން އަންގާފައިނުވާކަމަށް ޝުޖާ އެކްސްގައި ކުރެއްވި ޕޯސްޓުގައި ވިދާޅުވިއެވެ. 

އިތުރަށް ޝުޖާ ވިދާޅުވީ އެ ލިޔުމަކީ ސައްހަ ލިޔުމެއްނަމަ އެއީ އޭނާގެ ވިޔަފާރިން މަސައްކަތް ކާމިޔާބުކުރި ގޮތާއި، މަސައްކަތްތައް ކުރި ގޮތުގެ ހަގީގަތް އޮޅޭ ގޮތަށް ނުވަތަ ގަސްތުގައި އެކަންކަން އޮޅުވައލުމާއެކު، އޭނާގެ ހިއްސާ އޮންނަ ވިޔަފާރި ކުންފުންޏަށް ގެއްލުންދިނުމުގެ ބޭނުމުގައި ތައްޔާރުކޮށްފައިވާ ރިޕޯޓެއް ކަމަށެވެ. 

އެ ރިޕޯޓުގެ ސައްހަކަން ކަށަވަރުނުވާކަން ހާމަކުރެއްވުމާއެކު އެ ލިޔުމުގައި ހިމެނޭ ހުރިހާ ތުހުމަތުތަކެއް ދޮގުކުރައްވައި ޝުޖާ ވިދާޅުވީ ރައީސް އަބްދުﷲ ޔާމީނުގެ ވެރިކަމުގައި އަދި ރައީސް އިބްރާހީމު މުހައްމަދު ސޯލިހުގެ ވެރިކަމުގެ އިތުރަށް ރައީސް ޑރ.މުހައްމަދު މުއިއްޒުގެ ވެރިކަމުގައިވެސް އޭނާގެ ހިއްސާ އޮންނަ އޮފިޝަލް އިވެންޓްސްއިން މަޝްރޫއުތައް ކާމިޔާބުކުރީ އޮންނަ އުސޫލުގެ ތެރެއިން ބީލަން ހުށަހަޅައިގެންނެވެ. 

ޝުޖާ ވިދާޅުވީ އުސޫލުގެ ތެރެއިން އެ ކުންފުންޏަށް ބީލަންތައް ކާމިޔާބުކުރެވެނީ އެ ކުންފުނީގެ މަސައްކަތުގެ ތަޖުރިބާއާއި ކުރާ މަސައްކތުގެ ފެންވަރު ރަނގަޅުވީމަ ކަމަށެވެ. އަދި އެ ކުންފުނީގެ މަސައްކަތުގެ ފެންވަރު ކުރާ މަސައްކަތްތަކުން ފެންނާނެ ކަމުގައި ވިދާޅުވިއެވެ. 

"އަދި މިފަދަ މަސައްކަތްތަކުގެ ބިޑުތައް އަޅުގަނޑުމެންގެ ކުންފުންޏަށް ކާމިޔާބުވެފައި ވަނީ ތަޖުރިބާ އާއި މަސައްކަތުގެ ފެންވަރު ވަރަށް ބޮޑު ތަނުން ރަނގަޅުވީމާ ކަމީ ފެންނަން އޮތް ހަގީގަތެއް. އެ ކަންކަން އަޅުގަނޑުމެންގެ މަސައްކަތްތަކުން ފެންނާނެ،" ޝުޖާ ވިދާޅުވިއެވެ. 

އިތުރަށް ޝުޖާ ވިދާޅުވީ މަޖިލީހުގެ މެންބަރުންވެސް ހިމެނޭ ގޮތުން ދިވެހި ހުރިހާ ރަައްޔިތުންނަށް މިނިވަންކަމާއެކު ވިޔަފާރިކޮށް އާމްދަނީ ހޯދުމުގެ ހައްގު ލިބިގެންވެއެވެ. އަދި އުންމީދުކުރައްވަނީ އޭނާގެ ވިޔަފާރި އިތުރަށް ފުޅާކޮށް އެކަމުގައި ކުރިއަށް ވަޑައިގަތުމަށް ކަމުގައި ޝުޖާ ވިދާޅުވިއެވެ. 

އޭނާ ވިދާޅުވި ގޮތުގައި އޭނާގެ ހިއްސާ އޮންނަ އެއްވެސް ކުންފުންޏަަކާ ގުޅޭ ގޮތުން ތަހުގީގެއް ހިންގައި ކަމެއް ސާފުކުރުމަށް ދައުލަތުގެ އެއްވެސް އިދާރާއަކުން މިހާތަނަށް އޭނާއާ ސުވާލުކޮށްފަައިނުވެއެވެ. އަދި އިދާރާއަކުން ބަލަންޖެހޭ މައްސަލައެއް ނޯންނާނެ ކަމުގެ ޔަގީންކަން ޝުޖާ ދެއްވިއެވެ. 

ކިޔުންތެރިންގެ ހިޔާލު