ENGLISH
01 ސެޕްޓެމްބަރު 2025
އޮޅުހިޔާގެ ޖާގަ އިތުރުކޮށް، މިހާތަނަށް 112 ބުޅާ ފެސިލިޓީއަށް ބަދަލުކޮށްފި
03 އޯގަސްޓު 2025
|
އޮޅުހިޔާ ފެސިލިޓީއަށް ގެންގޮސްފައިވާ ބައެއް ބުޅާތައް ކޮށިތަކުގައި. ފޮޓޯ: ދަނޑުވެރިކަމާއި ދިރޭތަކެއްޗާ ބެހޭ ވުޒާރާ
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ހުޅުމާލޭގައި ހިންގަމުން އަންނަ އޮޅުހިޔާ ފެސިލިޓީގެ ކަރަންޓީނު ބައިގެ ޖާގަ 100 އަށް ފުޅާކޮށް، މިހާތަނަށް 112 ބުޅާ އެ ފެސިލިޓީއަށް ބަދަލުކޮށްފައިވާކަމަށް އެ ވުޒާރާއިން ބުނެފިއެވެ.
އެ ވުޒާރާއިން މީޑިއާތަކާ ޙިއްޞާކުރި މަޢުލޫމާތުގައި ބުނީ، މޫސުން ގޯސްވުމާއެކު އައި މެދުކެނޑުމަށް ފަހު މާލެ އާއި ހުޅުމާލޭއިން ބުޅާ ނެގުމުގެ މަސައްކަތް އޮގަސްޓް 2 ވަނަ ދުވަހު އަލުން ފަށާފައިވާކަމަށެވެ. އެގޮތުން އިއްޔެ، މާލެ އާއި ހުޅުމާލެއިން 37 ބުޅާ މަގުމަތިން ނަގައި ފެސިލިޓީގެ ކަރަންޓީނު ބަޔަށް ބަދަލުކޮށްފައިވާކަމަށް އެ ވުޒާރާއިން މަޢުލޫމާތުދީފައިވެއެވެ. ބުޅާތައް ނެގީ އިއްޔެ ހަވީރު މާލޭގެ މެރީ ބްރައުން ސަރަޙައްދުންނާއި ރޭ ހުޅުމާލޭގެ އެކި ސަރަޙައްދުތަކުންނެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނީ އިއްޔެ މަސައްކަތް އަލުން ފެށިއިރު ފެސިލިޓީގައި ކަރަންޓީނުގައި ތިބި 34 ބުޅަލުގެ ތެރެއިން 19 ބުޅާ ކޮށިތަކަށް ބަދަލުކޮށްފައިވާކަމަށެވެ. އިއްޔެ ނެގި ބުޅާތަކާއެކު އެ ފެސިލިޓީގައި މިހާރު ޖުމްލަ ތިބީ 112 ބުޅާކަމަށް އެ ވުޒާރާއިން ބުނެފައިވެއެވެ.
އޮޅުހިޔާ ފެސިލިޓީގެ މަސައްކަތް ފެށިއިރު އެތަނުގައި ކަރަންޓީނުކުރެވޭ ވަސީލަތްތަކެއް ނެތެވެ. ކަރަންޓީނުގައި ވަކި މުއްދަތެއް ވަންދެން ބުޅާތައް ބައިތިއްބަން ޖެހޭތީ އެތަނުގެ ޖާގަ އިތުރުކުރުމުގެ މަސައްކަތް މިދިޔަ މަސްތަކުގައި ވަނީ ކޮށްފައެވެ. އެ މަސައްކަތްތަކާއެކު މިހާރު އެއްފަހަރާ 100 ބުޅާ ކަރަންޓީނު ކުރެވޭނެއެވެ.
ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނީ އިތުރު ބުޅާތައް ނެގުމުގެ މަސައްކަތް މިއަދު ވެސް ކުރިއަށްގެންދާނެ ކަމަށެވެ. އެންމެ ފުރަތަމަ ކަރަންޓީނުގެ ޖާގަތަކަށް ބުޅާތައް ގެންދިއުމަށްފަހު، ބުޅާތައް ލާންޖެހޭ ކޮށިތަކުގައި އިތުރަށް ފުރިހަމަ ކުރަންޖެހޭ މަސައްކަތްތައްވެސް ކުރަމުން އަންނަ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނެފައިވެއެވެ.