އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް ކުރި މަކަރާއި ޙީލަތުގެ 34 ދަޢުވާ އަށް ޙުކުމް އިއްވުން ނިއުޔޯކުގެ ފަނޑިޔާރު އަނެއްކާވެސް ފަަސްކޮށްފިއެވެ.

ޓްރަމްޕްގެ މައްޗަށް މެއި މަހު ކުށް ސާބިތުވެފައިވާއިރު، އޭނާގެ ޙުކުމް އިއްވުމަށް ހަމަޖެހިފައިވަނީ މިމަހުގެ 26 ވަނަ ދުވަހުއެވެ. ނަމަވެސް ޓްރަމްޕްގެ ވަކީލުން ވަނީ އޭނާގެ މައްޗަށް ސާބިތުވެފައިވާ ކުށް ބާތިލްކުރުމަށް އެދި ކޯޓުގައި ދަޢުވާ އުފުލައިފައެވެ.

ޓްރަމްޕްގެ ވަކީލުން ބުނާ ގޮތުގައި ރައީސްކަމުގެ އިމްތިޔާޒުގެ ދަށުން އޭނާގެ މައްޗަށް މިފަދަ ދަޢުވާއެއް ނުކުރެވޭނެއެވެ. އަދި މިފަދަ ދަޢުވާއަކުން އޭނާގެ ރައީސްކަމުގެ ވާޖިބުތަކަށް ހުރަސްއެޅޭނެ ކަމަށް ވެސް ވަކީލުން ބުނެފައިވެއެވެ.

މި މައްސަލަ ތަޙުޤީޤުކުރި މެންހެޓަން ޑިސްޓްރިކްޓް އެޓަރނީ އޮފީހުން ބުނެފައިވަނީ ޓްރަމްޕްގެ ވަކީލުންގެ މި މަސައްކަތަށް އިދިކޮޅު ހަދާނެ ކަމަށެވެ. އެހެންނަމަވެސް، ޓްރަމްޕްގެ ދެވަނަ ދައުރު ނިމެންދެން ޙުކުމް އިއްވުން ފަސްކުރުމަށް ފަނޑިޔާރަށް ލަފާދީފައިވެއެވެ.

ފަނޑިޔާރު ޖުއާން މަރޗަން ވަނީ މި މައްސަލައިގެ ދެ ފަރާތުން ހުށަހަޅާ ބަޔާންތައް ލިބެންދެން މައްސަލައިގެ އެންމެހާ އަޑުއެހުންތައް މެދުކަނޑާލައިފައެވެ. މި ބަޔާންތައް ހުށަހެޅުމުގެ ސުންގަޑިއަކީ ޑިސެމްބަރ 9 އެވެ.