ރާއްޖޭގައި ޤާއިމްކޮށްފައިވާ މަސްކަނދުފަތި ނެޓްވޯރކް ހަރުދަނާކުރުމަށްޓަކައި ޔުނައިޓެޑް ނޭޝަންސްގެ ފުޑް އެންޑް އެގްރިކަލްޗަރ އޯގަނައިޒޭޝަން (އެފް.އޭ.އޯ) އާ އެކު މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ފަހުމުނާމާއެއްގައި ސޮއިކޮށްފިއެވެ.

މި ފަހުމުނާމާގެ ދަށުން، އެފް.އޭ.އޯގެ ޓެކްނިކަލް ކޯޕަރޭޝަން ޕްރޮގްރާމްގެ އެހީތެރިކަން ހޯދައިގެން، ކަނދުފަތިތައް ކަނޑައިގެން ދިއުން މަދުކުރުމަށާއި، ޒަމާނީ އާލާތްތަކާއެކު ކަނދުފަތިތައް ޤާއިމްކުރުމަށް މަސައްކަތްކުރާނެއެވެ. މި މަޝްރޫޢުގެ އަމަލީ މަސައްކަތްތައް 2025 ވަނަ އަހަރުގެ ޖެނުއަރީ މަހު ފެށުމަށް ވަނީ ރޭވިފައެވެ.

މީގެ އިތުރުން، ކަނދުފަތި ތައްޔާރުކުރުމަށް އިތުރު ދެ ސެންޓަރެއް ޤާއިމްކުރުމަށް ވެސް ވުޒާރާއިން ވަނީ ނިންމާފައެވެ. ކަނދުފަތި ތައްޔާރުކުރުމަށް މިހާރު ބޭނުންކުރަނީ ހުޅުމާލޭގައި ހުރި ފެޑް ސެންޓަރު އެކަނި ކަމަށްވުމާއެކު، އިތުރަށް އަޅަންޖެހޭ ކަނދުފަތިތަކުގެ ޑިމާންޑަށް އެކަށީގެންވާ މިންވަރަށް ފޯރުކޮށްދިނުމަށް ދަތިވާތީ، ރާއްޖޭގެ އުތުރާއި ދެކުނުގައި އިތުރު ދެ ސެންޓަރު އެޅުމަށް ނިންމާފައިވެއެވެ.

މި ގޮތުން، ށ. ފޮނަދޫ އާއި ގދ. ވާދޫގައި އާ ފެޑް ސެންޓަރުތައް ޤާއިމްކުރުމަށް ވަނީ ހަމަޖެހިފައެވެ. ށ. ފޮނަދޫގައި އަޅާ ސެންޓަރުގެ ބިން ހަމަޖެއްސުމާއި ޑިޒައިން ކުރުމުގެ މަސައްކަތް މިހާރު ވަނީ ފަށައިފައެވެ.

މި މަޝްރޫޢުގެ ސަބަބުން، އަލަށް އަޅާ މަސްކަނދުފަތިތަކާއި، ކަނޑައިގެން ދާ ކަނދުފަތިތަކުގެ ބަދަލުގައި އަޅަންޖެހޭ ކަނދުފަތިތަކާއި، މުނިފޫހިފިލުވުމުގެ މަސްވެރިކަމަށް އަޅަންޖެހޭ ކަނދުފަތިތައް އިތުރު ފަސޭހަކަމާއެކު ތައްޔާރުކުރެވޭނެ އެވެ.