ވ. އަތޮޅުގައި ނާޒުކު އަދި ދަތި ހާލަތްތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ އާއި އެހީ ޖަމުޢިއްޔާއިން ފަށައިފިއެވެ.

ވ. އަތޮޅު ކައުންސިލާ ގުޅިގެން ކުރިއަށް ގެންދާ މި ޕްރޮގްރާމުގެ ދަށުން، ވ. އަތޮޅުގައި ދަތި ހާލުގައި ދިރިއުޅޭ ޢާއިލާތަކުގެ ދިރިއުޅުމުގެ ހާލަތު ދެނެގަނެ، އެހީތެރިކަން ފޯރުކޮށްދިނުމުގެ މަސައްކަތް ކުރުމަށް މަޝްވަރާތައް ވެސް މިހާރު ވަނީ ކުރެވިފައެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނީ، ދަތި ހާލުގައި އުޅޭ ފަރާތްތަކަށް އެހީތެރިކަން ފޯރުކޮށްދިނުމާއި، އެމީހުންގެ ހާލަތު ރަނގަޅުކުރުމަށް ކުރެވޭ ކޮންމެ މަސައްކަތަކީ ސަރުކާރުގެ ކަމާ ބެހޭ މުއައްސަސާތަކާއި، އިޖުތިމާޢީ ޚިދުމަތްތެރިންނާއި، ދަރުމަވެރިންނާއި، އާންމު ފަރުދުންގެ ހިއްސާއާއެކު ކުރެވޭނެ މަސައްކަތެއް ކަމަށެވެ. އަދި މި ވުޒާރާ އާއި އެހީ ޖަމުޢިއްޔާ އަދި ވ. އަތޮޅު ކައުންސިލުން ފަށާފައިވާ މި މަސައްކަތުގައި ބައިވެރިވެ އެހީތެރިކަން ފޯރުކޮށްދިނުމަކީ ވަރަށް މުހިންމު ކަމެއް ކަމަށް ވުޒާރާއިން ފާހަގަކުރިއެވެ.

މި މަސައްކަތަކީ ވ. އަތޮޅުގެ ނިކަމެތި އަދި އެހީއަށް ބޭނުންވާ ފަރާތްތަކުގެ ދިރިއުޅުމުގެ ފެންވަރު މަތިކޮށް، އެ ފަރާތްތަކަށް ދާއިމީ ބޯހިޔާވަހިކަން ހޯދައިދިނުމަށް އަމާޒުކޮށްގެން ކުރިއަށްގެންދާ މުހިންމު މަސައްކަތެކެވެ.