ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ލުބްނާނުގެ މިނިވަން ދުވަހުގެ މުނާސަބަތުގައި އެ ޤައުމުގެ ބޮޑުވަޒީރު މުޙައްމަދު ނަޖީބު ޢަޒްމީ މީޤާތީއަށާއި ރައްޔިތުންނަށް ތަހުނިޔާގެ މެސެޖެއް ފޮނުއްވައިފިއެވެ.

ރައީސް މުޢިއްޒު ފޮނުއްވި މެސެޖުގައި، ލުބްނާނުގެ ސަރުކާރަށާއި ރައްޔިތުންނަށް އިޚްލާޞްތެރި ހެޔޮއެދުންތައް ފޮނުއްވާފައިވެއެވެ. އަދި ދެ ޤައުމުގެ މެދުގައި ޒަމާނުއްސުރެ އޮތް އަޚުވަންތަ ގުޅުން އިތުރަށް ބަދަހިވެގެންދާނެކަމުގެ އުންމީދު ފާޅުކުރައްވާފައިވެއެވެ.

މިއަދަކީ ލުބްނާނަށް ގިނަ ގޮންޖެހުންތަކަކާ ކުރިމަތިލާން ޖެހިފައިވާ ދުވަސްވަރެއްކަން ފާހަގަކުރައްވަމުން، ރައީސް މުޢިއްޒު ވަނީ އެ ޤައުމުގެ އަޚުންނާއި އުޚުތުންނާއެކު ދިވެހިރާއްޖެ އަބަދުވެސް ދެމި އޮންނާނެކަމުގެ ޔަޤީންކަން ދެއްވައިފައެވެ.

މީގެއިތުރުން، ލުބްނާނުގެ ބޮޑުވަޒީރަށް ދުޅަހެޔޮ ޞިއްޙަތަކަށް އެދިވަޑައިގެން، އެ ޤައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގެންފައިވާކަންމވެސް ރައީސް މުޢިއްޒުގެ މެސެޖުގައި ފާހަގަކުރައްވާފައިވެއެވެ.

ލުބްނާނުގެ މިނިވަން ދުވަހަކީ އެ ޤައުމުގެ ރައްޔިތުން ކޮންމެ އަހަރަކު ނޮވެމްބަރު 22 ވަނަ ދުވަހު ފާހަގަކުރާ ޤައުމީ ދުވަހެކެވެ. މި ދުވަހަކީ 1943 ވަނަ އަހަރު ފްރާންސްގެ ބާރުން ވަކިވެ، ލުބްނާނު މިނިވަންވި ދުވަހެވެ.