ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި ތަރައްޤީ ކޮށްފައިވާ 4000 ހައުސިން ޔުނިޓްގެ ކުލި އަދި ސެކިއުރިޓީ ޑިޕޮސިޓާ ގުޅޭގޮތުން އުފެދިފައިވާ ކަންބޮޑުވުންތައް އެ ކޯޕަރޭޝަނުން ސާފުކޮށްދީފި އެވެ.

އެފްޑީސީ އިން ބުނީ މި ޔުނިޓްތައް ލިބޭ މީހުންނާއެކު ހަދާ އެއްބަސްވުންތަކަކީ ޝަރީޢާގެ ހަމަތަކާއި އެއްގޮތްވާ ގޮތުގެ މަތީން އެކުލަވާލެވޭ އެއްބަސްވުމެއް ކަމަށެވެ. މި އެއްބަސްވުމުގެ ދަށުން ދައްކަން ޖެހޭ މަހު ކުއްޔާއި މެއިންޓެނަންސް ފީ އެ މަހެއްގެ 10 ވަނަ ދުވަހުގެ ކުރީން ދައްކައިފިނަމަ އެ މީހަކަށް 100 އިންސައްތަ ސަބްސިޑީ މަންފާ ލިބޭނެ ކަމަށް އެފްޑީސީން ބުންޏެވެ.

* މަހުގެ 16 ގެ ކުރީން ކުލި ދައްކައިފިނަމަ 75 އިންސައްތަ ސަބްސިޑީ މަންފާ ލިބޭނެ

* މަހުގެ 21 ގެ ކުރީން ކުލި ދައްކައިފިނަމަ 50 އިންސައްތަ ސަބްސިޑީ މަންފާ ލިބޭނެ

* މަހުގެ 26 ގެ ކުރީން ކުލި ދައްކައިފިނަމަ 25 އިންސައްތަ ސަބްސިޑީ މަންފާ ލިބޭނެ

* މަހުގެ 26 ގެ ފަހުން ކުލި ދައްކާނަމަ ސަބްސިޑީ މަންފާ ނުލިބޭނެ

ހަތަރުހާސް ފްލެޓްގެ ތެރޭގައި ހިމެެނެނީ ދެ ކޮޓަރީގެ އެޕާޓްމަންޓާއި ތިން ކޮޓަރީގެ އެޕާޓްމަންޓެވެ. ދެ ކޮޓަރީގެ އެޕާޓްމަންޓްގެ ކުއްޔަކީ 9,000 ރުފިޔާ އެވެ. ނަމަވެސް ސަރުކާރުން ސަބްސިޑީ ދިނުމަށް ނިންމުމުން ކުލީގެ ގޮތުގައި ދައްކަން ޖެހޭނީ 7,000 ރުފިޔާ އެވެ. ތިން ކޮޓަރީގެ އެޕާޓްމަންޓްގެ ކުއްޔަކީ 13,000 ރުފިޔާ އެވެ. ސަބްސިޑީ ދިނުމުން ކުލީގެ ގޮތުގައި ދައްކަން ޖެހޭނީ 9,000 ރުފިޔާ އެވެ.

ސަބްސިޑީގެ މަންފާ ލިބޭނީ އެ މީހަކު ކުލި ދައްކާ ތާރީޚެއްގެ ނިސްބަތުންނެވެ. 

އެފްޑީސީ އިން ބުނީ ޔުނިޓްގެ ސެކިއުރިޓީ ޑިޕޮސިޓްގެ ގޮތުގައި ދައްކަން ޖެހޭނީ ދެ ކޮޓަރިއަށް 15,000 އަދި ތިން ކޮޓަރިއަށް 25,000 ރުފިޔާ ކަމަށެވެ. މެއިންޓެނަންސް ފީގެ ގޮތުގައި ދެ ކޮޓަރިއަށް 1,000 އަދި ތިން ކޮޓަރިއަށް 1,500 އެވެ.

މިއީ ކުލި ނުދައްކާ މައްސަލައަށް ޙައްލެއް ލިބޭ ގޮތަށް އަދި ޤަވާއިދުން ކުލި ދައްކާ މީހުންނަށް އެކަމުގެ ފައިދާ ލިބޭ ގޮތަށް އެފްޑީސީން ނިންމާފައިވާ މުހިންމު ނިންމުމެކެވެ.