ސޯޅަ އަހަރުން ދަށުގެ ކުދިންނަށް ސޯޝަލް މީޑިއާ މަނާކުރުމުގެ ފުރުސަތު އޮތްކަމަށް އިނގިރޭސި ވިލާތުގެ ޓެކްނޮލޮޖީ ސެކްރެޓަރީ ޕީޓަރ ކައިލް ވިދާޅުވެއްޖެއެވެ.

ބީބީސީ ރޭޑިއޯ 4 ގެ "ޓުޑޭ" ޕްރޮގްރާމްގައި ވާހަކަދައްކަވަމުން، އޭނާ ވިދާޅުވީ ކުޑަކުދިން އޮންލައިން ޕްލެޓްފޯމްތަކުން ރައްކާތެރިކުރުމަށް ކުރަންޖެހޭ ހުރިހާ ކަމެއް ކުރާނެ ކަމަށެވެ.

ސްމާޓްފޯނާއި ސޯޝަލް މީޑިއާ ފަދަ ޓެކްނޮލޮޖީތަކުން ޒުވާނުންނަށް ކުރާ އަސަރާ ގުޅޭގޮތުން އިތުރު ދިރާސާތަކެއް ކުރިއަށްގެންދާނެ ކަމަށް ވެސް އޭނާ އިޢުލާނުކުރެއްވިއެވެ. 

އޮންލައިން ސޭފްޓީ އެކްޓް (އޯއެސްއޭ) ގެ ދަށުން އިތުރު ބާރުތަކެއް ލިބިގަންނަ ރެގިއުލޭޓަރ އޮފްކޮމްއަށް "ސްޓްރެޓެޖިކް އިންޓެންޓް ސިޓީއެއް" ފޮނުވާފައިވާކަމަށް ކައިލް ވިދާޅުވިއެވެ. މި ސިޓީގައި އޭނާ އިސްކަންދޭ ކަންތައްތައް ބަޔާންކޮށްފައިވާ ކަމަށް ވިދާޅުވިއެވެ.

ޤާނޫނީ ވަކީލު އިއޯނާ ސިލްވަރމަން ވިދާޅުވީ ސޯޝަލް މީޑިއާ މަނާކުރުމަކީ ވަރަށް ބޮޑު މައްސަލައެއްގެ ކުޑަ ބައެއް ކަމަށާއި، ފުރާވަރު ކުދިން އެހެން ގޮތްގޮތުން މައްސަލަ ހުރި ކޮންޓެންޓް ހޯދާނެ ކަމަށެވެ. އޭނާ ވިދާޅުވީ ސަރުކާރުން މި މައްސަލައާމެދު ފުޅާކޮށް ވިސްނަންޖެހޭ ކަމަށާއި، މިއީ ސަގާފީ ބަދަލަކާއި ޓެކްނޮލޮޖީއަށްވުރެ ކުރިއަށް ދާ ޤާނޫނުތަކެއް ބޭނުންވާ މައްސަލައެއް ކަމަށެވެ.

ޒުވާނުންނަށް ސޯޝަލް މީޑިއާ ބޭނުންކުރުން ޤާނޫނީގޮތުން ހަނިކުރުމުގެ ޚިޔާލު އުފަންވެފައި މިވަނީ އޮސްޓްރޭލިއާ ސަރުކާރުން 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރުމަށް ޤާނޫނެއް ތަޢާރަފުކުރާނެ ކަމަށް ބުނުމާ ގުޅިގެންނެވެ. 

އޯއެސްއޭގެ ދަށުން، ޓެކް ކުންފުނިތަކުން އެމީހުންގެ ޕްލެޓްފޯމްތަކުގައިވާ ކޮންޓެންޓްތަކަށް އިތުރު ޒިންމާ ނަގަންޖެހޭނެއެވެ. މީގެ ތެރޭގައި ޤާނޫނީގޮތުން ހުއްދަ ނަމަވެސް ގެއްލުންދެނިވި ބައެއް މާއްދާތަކުން ކުޑަކުދިން ރައްކާތެރިކުރުން ހިމެނެއެވެ.

ކައިލް ވިދާޅުވީ ޓެކް ކުންފުނިތަކުން އެކަށީގެންވާ އުމުރު ޔަގީންކުރުމުގެ ނިޒާމުތައް ތަންފީޒުކުރާކަމުގެ ހެކި ފެންނަން ބޭނުންވާ ކަމަށާއި، އަދި މި ދާއިރާއިން "ފެށުނީއްސުރެ ރައްކާތެރިކަން ހިމެނިފައިވާ" ގޮތަކަށް ކުރިއަށްދާކަން ދެކެން ބޭނުންވާ ކަމަށެވެ.