ރައްޔިތުންގެ މަޖިލީހުގެ މެންބަރަކު ހުރި ޕާޓީން އަމިއްލަ އަށް ވަކިވެ ނުވަތަ ޕާޓީން ވަކިކޮށްފި ނަމަ މަޖިލީހުގެ ގޮނޑި ގެއްލޭ ގޮތަށް ގާނޫނު އަސާސީ އަށް ހުށަހެޅި އިސްލާހު ބަލައިގަނެ ބިލް އަވަސްކުރުމުގެ ގޮތުން މުޅި މަޖިލިސް ކޮމިޓީ އަށް ފޮނުވަން އެމްޑީޕީގެ މެންބަރަކު ވެސް ތާއީދުކޮށްފައިވާކަން ހާމަވެއްޖެއެވެ.

ގޮނޑި ގެއްލޭ އިސްލާހު މުޅި މަޖިލިސް ކޮމިޓީ އަށް ފޮނުވަން ވޯޓު ދެއްވި 71 މެންބަރުންގެ ތެރޭގައި މާވަށު ދާއިރާ ތަމްސީލް ކުރައްވާ އެމްޑީޕީގެ މެންބަރު އަހުމަދު ޝާކިރު ވެސް ހިމެނިވަޑައިގަންނަވައެވެ. ބިލް މުޅި މަޖިލިސް ކޮމިޓީ އަށް ފޮނުވުމާ ދެކޮޅަށް 11 މެންބަރަކު ހިމެނެ އެވެ. އޭގެ ތެރޭގައި ޝާކިރު ފިޔަވައި ދެން ތިއްބެވި އެމްޑީޕީގެ އެހެން ހުރިހާ މެންބަރުން ވެސް ހިމެނެ އެވެ. 

ޕާޓީ ބަދަލުކުރުމުން ގޮނޑި ގެއްލޭ އިސްލާހު އަވަސްކުރުމުގެ ގޮތުން މުޅި މަޖިލީހުގެ ކޮމިޓީން ފާސްކޮށް އިއްޔެ ހަވީރު ބޭއްވި މަޖިލީހުގެ ޖަލްސާ އިން އެ ބިލް ވަނީ ފާސްކޮށްފަ އެވެ. އަދި ބިލް ވަނީ ރައީސުލްޖުމްހޫރިއްޔާ ރޭ ތަސްދީގު ކުރެއްވުމާ އެކު ގެރެޓުގައި ޝާއިއުކޮށްފައެވެ.