ރާއްޖެ އާއި ޕާކިސްތާނާ ދެމެދު އަސްކަރީ ދާއިރާއިން ގުޅުން ބަދަހިކުރުމަށް މަޝްވަރާތައް ކުރިއަށް ގެންގޮސްފިއެވެ.

މި މަޝްވަރާތައް ކުރިއަށް ގެންދިޔައީ ޕާކިސްތާނުގައި މިހާރު ބާއްވަމުންދާ 12 ވަނަ އިންޓަރނޭޝަނަލް ޑިފެންސް އެގްޒިބިޝަން އެންޑް ސެމިނަރ (އައިޑީއީއޭއެސް 2024) ގައި ބައިވެރިވުމަށް ރާއްޖޭގެ ދިފާޢީ ވަޒީރު މުޙައްމަދު ޣައްސާން މަޢުމޫން ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ދިފާޢީ ވުޒާރާއިން މަޢުލޫމާތު ދެއްވާފައިވާ ގޮތުގައި، މިނިސްޓަރ ޣައްސާން ވަނީ ޕާކިސްތާނުގެ އަސްކަރިއްޔާގެ ޗީފް އޮފް އާމީ ސްޓާފް ޖެނެރަލް ސައީދު އާސިމް މުނިރްއާ ބައްދަލުކުރައްވައިފައެވެ. މި ބައްދަލުކުރެއްވުމުގައި ދެ ޤައުމުގެ މެދުގައި އަސްކަރީ ދާއިރާއިން ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެއްވިއެވެ.

އައިޑީއީއޭއެސް 2024 އަކީ ސަރަހައްދީ ޤައުމުތަކުގެ މެދުގައި އަސްކަރީ ދާއިރާއިން ގުޅުން ބަދަހިކޮށް، ގުޅިގެން މަސައްކަތްކުރެވޭނެ ގޮތްތައް ދެނެގަތުމަށް ބާއްވާ މުހިންމު ހަރަކާތެކެވެ. މިއަހަރުގެ ސެމިނަރގައި 38 ޤައުމަކުން ބައިވެރިވެފައިވާކަން ފާހަގަކުރެވެއެވެ.