އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަން ގާނޫނަށް ހުށަހަޅާފައިވާ އިސްލާހުގެ މަސައްކަތް، ހުއްޓުމެއް ނެތި ތާވަލާ އެއްގޮތަށް ކުރިއަށް ދާނެ ކަމަށް ޕީއެންސީ އިން ރޭ ބުނެފި އެވެ.

މިމަހުގެ 12 ވަނަދުވަހު އެމްޑީޕީން އިޒްރޭލުގެ ޕާސްޕޯޓު މަނާކުރުމުގެ ބިލުގެ މަސައްކަތް ކުރިއަށް ނުދާކަމަށް ބުނެ ރައްޔިތުންގެ މަޖިލީހަށް ވަނީ ގަރާރެއް ހުށަހަޅައިފައެވެ. މި ގަރާރު ހުށަހަޅާފައިވަނީ ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމް އެވެ. 

އިއްޔެ ބޭއްވި ރައްޔިތުންގެ މަޖިލީހުގައި އެ ގަރާރު ހުށަހަޅާފައިވީ ނަމަވެސް ޕީއެންސީގެ މެޖޯރިޓީއާ އެކު އެ ގަރާރު ވަނީ މަޖިލީހުން ބޭރުކޮށްފައެވެ. 

އިއްޔެ މަޖިލީހައް އެމްޑީޕީން ހުށަހެޅި ގަރާރު ބޭރުކޮށްލުމުން ގިނަބައެއްގެ ފާޑުކިޔުން އަމާޒުވުމާއިގުޅިގެން ޕީއެންސީން ރޭވަނީ ބަޔާނެއް ނެރެފައެވެ. 

ޕީއެންސީން ނެރުނު ބަޔާނުގައި ބުނެފައިވަނީ، އެމްޑީޕީގެ ފަރާތުން ހުށަހެޅި، އިސްރާއީލު ޕާސްޕޯޓު މަނާކުރުމުގެ ބިލް އަވަސްކުރުމަށް ބާރު އެޅުމަށް ސަރުކާރަށް ގޮވާލާ ގަރާރު ބަލައިނުގަތުމަށް ނިންމީ އެކަމުގައި އެމްޑީޕީގެ އަސްލު މަގްސަދަކީ ރައްޔިތުންގެ މަޖިލީހުގައި އިއްޔެ ކުރަން ހުރި ގިނަ މަސައްކަތުގެ ވަގުތު ބޭކާރުކޮށްލުން ކަމަށްވާތީ ކަމަށެވެ. އަދި އެ ގަރާރު ހުށަހަޅާފައިވަނީ ހެޔޮނިޔަތެއް އޮވެގެން ނޫންކަމަށް ވެސް އެ ބަޔާނުގައި ބުނެފައިވެއެވެ. 

މީގެ އިތުރުން ފަލަސްތީނުގެ ހައްގުގައި ބައިނަލްއަގުވާމީ މުޖުތަމަޢުގައި އެންމެ ބޮޑު މަސައްކަތެއް ކުރައްވާ އެއް ލީޑަރަކީ ރައީސް މުހައްމަދު މުޢިއްޒުކަމަށް އެބަޔާނުގައި ވަނީ ފާހަގަކޮށްފައެވެ. އަދި އިޒްރޭލު ޕާސްޕޯޓު މަނާކުރުމުގެ ބިލުގެ މަސައްކަތް، އެކަމާ ގުޅޭ މާހިރުންގެ ލަފަ  އާއި އިރުޝާދާ އެކު ކުރިއަށް ގެންގޮސް، ތާވަލާ އެއްގޮތަށް ނިއްމާނެ ކަމަށް ވެސް ޕީއެންސީން ވަނީ ބުނެފައެވެ.