އެމެރިކާގެ އާ ރައީސް ޑޮނަލްޑް ޓްރަމްޕްގެ ދެވަނަ ދައުރުގެ އެޑިޔުކޭޝަން މިނިސްޓަރުގެ މަޤާމަށް ވޯލްޑް ރެސްލިން އެންޓަރޓެއިންމަންޓް (ޑަބްލިޔު.ޑަބްލިޔު.އީ) ގެ ބާނީ ލިންޑާ މެކްމަހޯން ހަމަޖައްސައިފިއެވެ. 

ޓްރަމްޕްގެ އެންމެ ގާތް އެކުވެރިންގެ ތެރެއިން މީހެއްކަމަށްވާ މެކްމަހޯން، ވަނީ ޓްރަމްޕްގެ ފުރަތަމަ ދައުރުގައި ސްމޯލް ބިޒްނަސް އެޑްމިނިސްޓްރޭޝަން ހިންގަވައިފައެވެ. މީގެއިތުރުން ޓްރަމްޕްގެ ރިޔާސީ ކެމްޕޭނަށް މިލިއަނުން ޑޮލަރު ހަދިޔާކުރައްވާފައިވެއެވެ.

މެކްމަހޯން ހޮވުމާ ގުޅޭގޮތުން ޓްރަމްޕް ވިދާޅުވީ، އޭނާގެ ލީޑަރޝިޕް ތަޖުރިބާ އާއި، ތަޢުލީމާއި ވިޔަފާރީގެ ދާއިރާއިން ލިބިފައިވާ ތަޖުރިބާ ބޭނުންކޮށްގެން، ކުރިއަށް އޮތް ޖީލުގެ އެމެރިކާގެ ދަރިވަރުންނާއި މަސައްކަތްތެރިން ބާރުވެރިކުރުވާނެ ކަމަށެވެ.

ޓްރަމްޕް ކުރިން ވަނީ އެމެރިކާގެ އެޑިޔުކޭޝަން ޑިޕާޓްމަންޓާ ދެކޮޅަށް ފާޑުކިޔުންތައް އަމާޒު ކޮށްފައެވެ. އަދި އެ ޑިޕާޓްމަންޓް އުވާލާނެކަމަށް ވިދާޅުވެފައިވެއެވެ. 

މެކްމަހޯންގެ ހޮވުމަށް ނިންމާފައި ވަނިކޮށް، ޓްރަމްޕް ވަނީ މަޝްހޫރު ޑޮކްޓަރެއް ކަމަށްވާ މެހްމެޓް އޮޒް، ސެންޓަރސް ފޯ މެޑިކެއަރ އެންޑް މެޑިކެއިޑް ސަރވިސަސްގެ އިސްވެރިޔާގެ މަޤާމަށް ހަމަޖައްސަވައިފައެވެ.