ވޭޕް މަނާކުރަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ނިންމެއިރު، ވޭޕް މަނާކޮށްދޭން ރާއްޖޭގެ 215 ސްކޫލެއްގެ ޕީޓީއޭއިން ހުށައަޅާފައިވާ ކަމަށް އެޑިޔުކޭޝަން މިނިސްޓްރީން ބުނެފިއެވެ.

ވޭޕް މަނާކުރަން ރައީސް ޑރ. މުއިއްޒު ނިންމެވި ނިންމެވުމާ ގުޅިގެން ފޭސްބުކުގައި އެޑިޔުކޭޝަން މިނިސްޓްރީން ބުނެފައި ވަނީ ސިއްޙަތު ރަނގަޅު، ދުޅަހެޔޮ ދަރިވަރުން ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި މުހިންމު ނިންމެވުމެއް ކަމަށާއި އެ މިނިސްޓްރީގެ ހުރިހާ މުވައްޒަފުންނާއި، ބެލެނިވެރީންގެ ނަމުގައި ޝުކުރާއި މަރުޙަބާ ދަންނަވާ ކަމަށެވެ.

ވޭޕް މަނާކުރަން ނިންމިކަން އިއުލާން ކުރައްވައި، ރައީސް ޑރ. މުޙައްމަދު މުއިއްޒު ފޭސްބުކު ޕޭޖުގައި ވިދާޅުވީ، " ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަޅުގަނޑު އަންގައިފިން" ކަމަށެވެ.

ވޭޕް މަނާކުރަން ސަރުކާރުން ނިންމީ، ސިއްޙީ ދާއިރާގެ ތަޖުރިބާކާރުންނާއި ތަޢުލީމީ ދާއިރާގެ ބޭފުޅުންނާނާއި އާންމުން އެކަމަށް އެދެމެން ދަނިކޮށެވެ.