ގިނަ ބައެއްގެ މެދުގައި މަޝްހޫރު މެންޗެސްޓާރ ސިޓީގެ ކޯޗު ޕެޕް ގާޑިއޯލާ އެ ކްލަބުގައި އަދި އެއް އަހަރު މަޑުކުރަން އެއްބަސްވެއްޖެއެވެ.

އޭނާ ސިޓީއާއެކު ހަދާފައިވާ އެއްބަސްވުން މިސީޒަނަށް ހަމަވާތީ، ކްލަބްއާ އެކު ވަރަށް ގިނަ މަޝްވަރާތައް ކުރިކަމަށް މީޑީއާ ރިޕޯޓުތައް ބުނެއެވެ. އެ މަޝްވަރާތަކަށް ފަހު ގާޑިއޯލާ ނިންމީ އަދި އެއް އަހަރު ޓީމަށް ކޯޗު ކޮށްދޭށެވެ. އެއާއެކު އޭނާ ސިޓީއަށް ކޯޗުކަން ކޮށްދިން ސީޒަންތަކުގެ އަދަދު 10 އަށް އަރާނެއެވެ.

ސިޓީގެ ތާރީހުގައި އެންމެ ކުޅަދާނަ ކޯޗު ގާޑިއޯލާ ވަނީ ކުރިން ބާސެލޯނާ އަދި ބަޔާން މިއުނިކަށް ކޯޗުކޮށްދީފައެވެ. އޭނާގެ ކޯޗުކަމުގެ ދަށުގައު ސިޓީވަނީ 15 ތަށި ހޯދައިފައެވެ. އޭގެ ތެރޭގައި ޕްރިމިއާ ލީގުގެ ހަ ތަށި ވެސް ހިމެނެއެވެ.

ކޮންޓްރެކް އާ ކުރަން ގާޑިއޯލާ ނިންމީ މިހާރު ކުރިއަށްދާ ފީފާ ވިންޑޯ އަށް ކްލަބްގެ ހަރަކާތްތައް މެދުކަނޑާލި ހިސާބުން ކަމަށް އީއެސްޕީއިން ބުނެއެވެ.

މީގެ ކުރިން ގާޑިއޯލާ ވަނީ ދެ ފަހަރެއްގެ މަތިން އެއްބަސްވުން އާކޮށްފައެވެ. އެއީ 2020 އާއި 2022 ގައެވެ. 

ކުރިއަށް އޮތް ސީޒަނުގައި ގާޑިއޯލާ ޓީމަށް އިރުޝާދުދޭނީ އޭނާގެ އެންމެ ބޮޑު ވާގިވެރިޔާ ސްޕޯޓިން ޑައިރެކްޓަރު ޓިކިސިކީ ބެގްރިސްޓައިން ނުލަ އެވެ. އެއީ އޭނާ އުމުރުން 62 އަހަރުގައި އޭނާގެ ރިޓަޔާމެންޓް އިއުލާނުކޮށްފައިވާތީއެވެ. ގާޑިއޯލާ ބުނިގޮތުގައި އޭނާގެ ކާމިޔާބީތަކުގެ އަސްލަކީ ބެގްރިސްޓައިންއެވެ.