އިންޑިއާގެ ގައުމީ ފުޓުބޯޅަ މި އަހަރު ކުޅުނު އެއްވެސް މެޗަކުން މޮޅުނުވެ އަހަރު ނިންމާލަން ޖެހިއްޖެއެވެ.

މި އަހަރުގެ ފީފާ ވިންޑޯގެ އެންމެ ފަހު ބުރުގައި އިންޑިއާ އިން ކުޅޭ ފަހު މެޗުގައި ރޭ ބައްދަލުކުރީ މެލޭޝީޔާއާ ދެކޮޅަށެވެ. މިމެޗުން ބަލި ނުވެ ސަލާމަތްވީ ހަމަ ކިރިޔާއެވެ. އެއީ ރާހުލް ބެކޭ ކާމިޔާބުކޮށްދިން ގޯލުން މެޗުގެ ނަތީޖާ އެއްވަރުވެގެންނެވެ.

އިންޑިއާއިން މި އަހަރު ކުޅުނު 11 މެޗުގެ ތެރެއިން ހަ މެޗުން ބަލިވެފައިވާއިރު ބާކީ ފަސް މެޗުން ވަނީ އެއްވަރުވެފައެވެ. އަދި ބައިކޮޅަށް 11 ލަނޑު ވަދެފައިވާއިރު އެޓީމަށް ޖެހިފައިވަނީ އެންމެ ހަތަރު ލަނޑެވެ.

މިއީ އިންޑިއާގެ ދުވަސްވީ ފުޓްބޯޅަ ތާރީހުގައި އެއްވެސް މެޗެއް ކާމިޔާބު ނުކޮށް އަހަރު ނިންމައިލަން ޖެހުނު ދެވަނަ ފަހަރެވެ. މީގެ ކުރިން މިގޮތަށް އަހަރު ނިންމައިލަން ޖެހުނީ 2014 ވަނަ އަހަރު އެވެ. ނަމަވެސް އެ އަހަރު ކުޅުނީ އެންމެ ދެ މެޗެވެ.

އިންޑިއާގެ ފުޓުބޯޅަ ތަރި ސުނިލް ޗެތްރީ ވަނީ މި އަހަރުގެ ޖޫން މަހު ގައުމީ ޓީމުން ރިޓަޔާކޮށްފައެވެ. އަދި ޓީމަށް ފަސް އަހަރު ދުވަހު ކޯޗުކަން ކޮށްދިން ކްރޮއޭޝިއާގެ އީގޯ ސްޓިމަޗް ވެސް ވަނީ މަޤާމުން ވަކި ކޮށްފައެވެ. އެއީ އޭޝިއަން ކަޕުން ޖެހިޖެހިގެން ފަސް މެޗުން ބަލިވުމުންނެވެ.

އިންޑިއާގެ މިހާރުގެ ކޯޗަކީ މަނޯލޯ މާކްއޭޒްއެވެ. އޭނާ ޓީމާ ހަވާލުވެފައިވަނީ ޖުލައި 20 ވަނަ ދުވަހުއެވެ. އިންޑިއާގެ ގައުމީ ކޯޗުގެ މަގާމުގެ އިތުރުން އޭނާއަކީ ގޯއާ އެފްސީގެ ހެޑް ކޯޗު ވެސް މެއެވެ. އިންޑިއާގެ ފެޑެރޭޝަނުން ވަނީ ކްލަބުގެ ހެޑް ކޯޗުގެ މަގާމު އަދާކުރުމުގެ ހުއްދަ އޭނާ އަށް ދީފައެވެ.