ރާއްޖޭގެ ތާރީޚީ ބައެއް ބިނާތައް ސާފުކޮށް ބަލަހެއްޓުމުގައި ޒަމާނީ ވަސީލަތްތައް ބޭނުންކޮށްގެން ބައެއް އަމަލީ އެހީތެރިކަން ދިނުމަށްޓަކައި ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އާއި ދިވެހި ބަހާއި ސަގާފަތާއި ތަރިކައާއި ބެހޭ ވުޒާރާއާ ދެމެދު އެއްބަސްވުމެއްގައި ސޮއިކޮށްފި އެވެ.

ވެމްކޯގެ މައި އޮފީހުގައި އިއްޔެ ބޭއްވި ރަސްމިއްޔާތުގައި އެ ކުންފުނީގެ ފަރާތުން އެ ފަހުމުނާމާގައި ސޮއިކުރެއްވީ މެނޭޖިންގ ޑިރެކްޓަރ މުޖުތަބާ ޖަލީލެވެ. ވުޒާރާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ މުހައްމަދު ޔާނިއު ހާޝިމެވެ.

މި އެއްބަސްވުމުގެ ދަށުން، ފަސޭހައިން ވާސިލުވެވޭ ގޮތަށް ހުރި ތަރިކައިގެ ބައެއް ބިނާތައް ކޮންމެ ތިން މަހަކުން އެއްމަހު ބަލައި ވެކިއުމްކޮށް، ތަނުގެ ސާފުކަމާއި ޒީނަތްތެރިކަމަށް ބޭނުންވާ ހިދުމަތްތައް ވެމްކޯއިން ފޯރުކޮށްދެމުންދާނެ އެވެ. 

ރާއްޖޭގެ ތަރިކަ ރައްކާތެރި ކުރުމަކީ ސަރުކާރުނ ޚާއްސަ އިސްކަމެއް ދީގެން ކުރިިއަށް ގެންދާ މަސައްކަތަކަށް ވާއިރު، އެ މަސައްކަތުގައި ސަރުކާރު ހިއްސާވާ ކުންފުނިތަކުގެ އެއްބާރުލުން ލިބެމުންދާ ކަމަށް ވުޒާރާއިން ވަނީ ބުނެފަ އެވެ.