މާދަމާ ފާހަގަކުރާ މިއަހަރުގެ އަޟްހާ ޢީދުގެ ފުރަތަމަ ދުވަހާ ގުޅިގެން، އެމްޓީސީސީއިން ދޭ ފެރީ އާއި ބަހުގެ ހިދުމަތްތައް ފޯރުކޮށްދޭ ގަޑިތަކަށް ބަދަލުގެނެސް އާއްމުކޮށްފިއެވެ. 

އެމްޓީސީއިން ބުނީ ގްރޭޓާ މާލެ ސަރަހައްދުގައި ބަސް ދަތުރުތައް ޢީދު ދުވަހު ފެށުމަށް ހަމަޖެހިފައިވަނީ ހެނދުނު 8:00 އިން ފެށިގެން ކަމަށެވެ. އެހެންނަމަވެސް، ދަތުރުވެރިންނަށް ފަސޭހަކޮށްދިނުމުގެ ގޮތުން ޢީދު ނަމާދުގެ ކުރިން މާލެ އަދި ހުޅުމާލޭގެ ފޭސް 1 އަދި ފޭސް 2 އިން ވެލާނާ އިންޓަނޭޝަނަލް އެއާޕޯޓަށް ފަތިހު ދަތުރުކުރާގޮތަށް ވަނީ ހަމަޖައްސައިފައެވެ. 

އެމްޓީސީސީއިން އިތުރަށް ބުނީ، އަޟްހާ ޢީދުގެ ފުރަތަމަ ދުވަހު އެ ކުންފުނިން އަތޮޅުތެރެއަށް ފޯރުކޮށްދެމުންދާ ސީއެފްއެން ލަކުޑި ފެރީ އާއި އާރުޓީއެލް ފެރީ ދަތުރުތައް ޝެޑިއުލްކުރެވިފައި ނުވާނެ ކަމަށެވެ. 

އެމްޓީސީސީ އިން 'އެކްސް' ގައި ކުރި ޕޯސްޓުގައި ބުނީ ޢީދު ދުވަހަށް ހާއްސަކޮށްގެން ފެރީތަކާއި ބަހުގެ ގަޑިތަކަށް ބަދަލު ގެނައުމުން، އެ ޝެޑިއުލަށް ބަލައިގެން ދަތުރުތައް ކުރުމަށް އިލްތިމާސްކުރާ ކަމަށެވެ. އަދި އިތުރު މައުލޫމާތު ބޭނުންވާ ފަރާތްތަކުން އެ ކުންފުނީގެ ހޮޓްލައިން 1650 އަށް ގުޅުމަށް އެދިފައިވެއެވެ.