މަސްވެރިންގެ ދަފްތަރުގައި ރަޖިސްޓަރީ ކުރާ ހުރިހާ މަސްވެރިންނަށް ހައުސިން ލޯން ސްކީމްގައި ބައިވެރިވެވޭ ގޮތަށް ސިޔާސަތެއް އެކުލަވާއިލުމަށް ސަރުކާރުން ނިންމައިފިއެވެ.

މަސްވެރިންނަށް ހިޔާވަހި ފައިނޭންސިން ސްކީމްގައި ބައިވެރިވުމަށް ދިމާވާ ދަތިތަކަށް ހައްލު ހޯދައިދިނުމަށް ކުރާ މަސައްކަތާ ގުޅޭ ގޮތުން ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާ ގުޅިގެން ވަނީ ނޫސްވެރިންގެ ބައްދަލުވުމެއް ބާއްވާފައެވެ.

މި ބައްދަލުވުމުގައި ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވަޒީރު ޑރ. ޢަލީ ޙައިދަރު އަޙްމަދު އާއި މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމްވެސް ބައިވެރިވެ ވަޑައިގެންނެވިއެވެ.

ވަޒީރު ހައިދަރު ވިދާޅުވީ ސަރުކާރުން ހުޅުވާލާފައިވާ ހައުސިން ލޯން ސްކީމްގެ ހުރިހާ ދާއިރާއެއްގައިވެސް މަސްވެރިންގެ ދާއިރާގައި މަސައްކަތްކުރާ ފަރާތްތަކަށް ބައިވެރިވެވޭނެ ކަމަށާއި އިގްތިސާދީ ދާއިރާގައި މަސައްކަތް ކުރާ ހުރިހާ ފަރާތްތަކަކީ ވެސް ލޯން ސްކީމުގެ ތެރޭގައި ބައިވެރިވާން ޖެހޭނޭ ބައެއް ކަމަށެވެ.

އެގޮތުން ސަރުކާރުންވަނީ ފަތުރުވެރިކަމުގެ ދާއިރާއާއި ދަނޑުވެރިކަމުގެ ދާއިރާގައި އުޅޭ ފަރާތްތައްވެސް ބައިވެރިކުރުމަށް ކަނޑައަޅާފައިކަމަށް ވަޒީރު ވިދާޅުވިއެވެ.

ހައުސިން ލޯން ސްކީމުގައި އެހެން ދާއިރާތައް ވެސް ކުރިއަށް އޮތް ދުވަސްތަކުގެ ތެރޭގައި ޝާމިލުކުރާނެ ކަމަށާއި ދަފްތަރު މަސައްކަތުގައި އުޅޭ ފަރާތްތަކަށް ވަކިން ހާއްސަކޮށް އިސްކަން ދޭން ސަރުކާރުން ރާވާފައިވާ ކަމަށްވެސް ވަޒީރު ފާހަގަކުރެއްވިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވަނީ މަސްވެރިން ރައީސުލްޖުމްހުރިއްޔާގެ ގެދޮރުވެރިކަމުގެ ސިޔާސަތުން މަހުރޫމް ނުވާނޭ ބަޔަކަށް ހެއްދެވުމަށްޓަކައި ކުރަމުން ގެންދާ މަސައްކަތްޕުޅަށް ރައީސް ޑރ މުހައްމަދު މުއިއްޒުއަށާއި ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވަޒީރު ޑރ. ޢަލީ ޙައިދަރު އަޙްމަދު އަށް ޝުކުރު ދަންނަވާފައެވެ.

ވަޒިރު ޝިޔާމް ވިދާޅުވީ މަސްވެރިންނަކީ ދައުލަތް ދަންނަ ބަޔަކަށް ހެދުމަށް އެންމެ ފުރަތަމަ ދުވަހުން ފެށިގެން ވެސް މި ސަރުކާރުން މަސައްކަތްކުރަމުން ގެންދާކަމަށެވެ.

ބޭންކުން ނުވަތަ ކުންފުންޏަކުން ތައާރަފްކުރާ ފެސިލިޓީއަކަށްވެސް، ލޯން ސްކީމަކަށްވެސް ޝަރުތު ހަމަނުވާ ވާހަކައަކީ މަސްވެރިންގެ ވަރަށް ބޮޑު ޝަކުވާއެއް މިނިސްޓަރ ވިދާޅުވިއެވެ. އެގޮތުން މިއަހަރުގެ ފެބްރުއަރީ މަހު އެކުލަވާލާފައިވާ މަސްވެރިންގެ ދަފްތަރަކީ މިކަމަށް ހައްލެއް ހޯދުމަށް ސަރުކާރުން ތަޢާރަފްކުރި ދަފްތަރެއް ކަމަށެވެ. ވަޒީރު ވިދާޅުވީ ނިމިދިޔަ އެއްވެސް ސަރުކާރަކަށް މިކަމަށް ދާއިމީ ހައްލެއް ހޯދިފައި ނުވާ ކަމަށްވެސް މިނިސްޓަރު ވިދާޅުވިއެވެ.

ވަޒީރު ވިދާޅުވީ މި އަހަރުގެ ނިޔަލަށް މި މަސައްކަތް ނިންމުމަކީ އެ ވުޒާރާގެ އަމާޒެއްކަމަށާއި މިހާރު 80 އިންސައްތަ މަސްވެރިން ދަފްތަރު ކުރެވިއްޖެ ކަމަށެވެ. އެގޮތުން މިހާރު ރާއްޖޭގެ 15 މަސްވެރިކަން ކުރާ އަތޮޅަކަށް ވުޒާރާގެ ޓީމެއް ގޮސް ދަފްތަރުގައި މަސްވެރިކަމުގެ ސިނާއަތުގައި އުޅޭ މީހުން ރަޖިސްޓްރީކުރުމުގެ މަސައްކަތް ކުރިއަށް ގެންދާ ކަމަށް ވަޒީރު ވިދާޅުވިއެވެ.

"ބޯހިޔާވަހިކަމަކީ އެންމެ ބޮޑަށް ބަޖެޓުގައި އޮތް، މުޅި ބަޖެޓްވެސް އޮތީ ބޯހިޔާވަހިކަމުގެ މައްޗަށް. އެހެންކަަމަށްވާނަމަ މަސްވެރިން މިފަދަ އަހަރަކުން މަހުރޫމް ނުވާނަމަ، އެއީ ޔަގީނުންވެސް ދިވެހިރާއްޖޭގެ ބޮޑު އާބާދީއަކަށް ލިބޭ ވަރަށް ބޮޑި ހިތްހަމަޖެހުމެއް." ވަޒީރު ވިދާޅުވިއެވެ.

މަސްވެރިކަމުގެ ގާނޫނުގެ ނުވަ ވަނަ މާއްދާގައި މަސްވެރިކަމުގެ ދަފްތަރެއް އެކުލަވާއިލުމަށް އޮންނަ ކަމަށް ވަޒީރު ފާހަގަކުރެއްވިއެވެ. އަދި 10 ވަނަ މާއްދާގައި މަސްވެރިކަމުގެ އިޖްތިމާއީ ކަށަވަރުކަން ރައްކާތެރިކުރުމަށް ގާނޫނުގައި އޮންނަ ކަމަށް ވަޒީރު ފާހަގަކުރެއްވިއެވެ.

ރާއްޖޭގައި އޮތް އެންމެ ބޮޑު އިޖްތިމާއީ މައްސަލައަކީ ގެދޮރުވެރިކަން ކަމަށް މިނިސްޓަރު ފާހަގަ ކުރެއްވިއެވެ. އަދި ކުރިއަށް އޮތް ތާގައި އެހެން ދާއިރާތަކެކޭ އެފަދައިން މަސްވެރިންނަށް ވެސް ގެދޮރުގެވެރިކަމަށް ހައްލު ލިބޭނެކަމުގެ ޔަގީންކަން މިނިސްޓަރު ދެއްވިއެވެ.