އެމެރިކާގައި ކުރިޔަށްދާ ކެރަމް ވޯލްޑްކަޕް 2024ގެ ސެމީއަށް ދިވެހިރާއްޖޭގެ އަންހެން ޓީމާއި ފިރިހެން ޓީމު ދަތުރުކޮށްފިއެވެ. މުބާރާތުގެ ސެމީ ފައިނަލުގައި ރާއްޖެ ވާދަކުރަންޖެހެނީ އަވަށްޓެރި ސްރީލަންކާއާ އެވެ.

އެމެރިކާގެ ކެލިފޯނިއާ ސްޓޭޓުގެ ސެން ފްރެންސިސްކޯ ބޭ އޭރިއާގައި މިހާރު ކުރިޔަށްދަނީ ހަވަނަ ކެރަމް ވޯލްޑްކަޕެވެ.

ރާއްޖޭގެ ގައުމީ ޓީމުގެ ސްކޮޑުގައި ހިމެނެނީ ފަސް ފިރިހެން ކުޅުންތެރިންނާއި، ފަސް އަންހެން ކުޅުންތެރިންނެވެ. ގައުމީ ފިރިހެން ޓީމުގައި ހިމެނެނީ؛ އިސްމާއިލް އަޒްމީން، އިބްރާހިމް ހުޖާން އަލީގެ އިތުރުން ހަސަން ނާޒިމް އާއި މުޙައްމަދު މުންތަސިރު އަދި ޚާތިމް ޚަލީލް އެވެ. ގައުމީ އަންހެން ޓީމުގައި ހިމެނޭ ކުޅުންތެރިންނަކީ؛ އައިމިނަތު ވިދާދް، އައިޝަތު ނަހުފާ، އައިޝަތު ފައިނާޒް، ފާތިމަތު ރަޔާނާ އާއި އައިމިނަތު ޝުބާ އާދަމް އެވެ.

މި އަހަރުގެ ވޯލްޑް ކަޕްގައި ވެސް އޯޕަން ސިންގަލްސް، އޯޕަން ޑަބަލްސްގެ އިތުރުން ޓީމް އިވެންޓް އަދި ސްވިސް އިވެންޓް ކުޅުމަށް ހަމަޖެހިފައިވެއެވެ. މީގެއިތުރުން ޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ހަމަޖެހިފައިވެއެވެ.