ދިވެހި ފުލުހުންގެ ހިދުމަތުން، މުޅި ރާއްޖެ ހިމެނޭ ގޮތަށް ވޯކް އެންޑް ޓޯކް ހަރަކާތެއް ކުރިއަށް ގެންގޮސް ރައްޔިތުންގެ ކަންބޮޑުވުންތައް އޮޅުން ފިލުވައިފި އެވެ.

އިއްޔެ ހަވީރު 4:00 އިން ފެށިގެން 6:00 އަށް ކުރިއަށް ގެންދިޔަ މި ހަރަކާތަކީ އަމާން މުޖުތަމައެއް ގާއިމުކުރުމަށާއި ރައްޔިތުންނާ ގުޅުން ބަދަހިކުރުމާއި އާންމު ރައްޔިތުންގެ ހުރި ކަންބޮޑުވުންތައް ދެނެގަތުމަށް ކުރިއަށް ގެންދިޔަ ހަރަކާތެކެވެ.

އިއްޔެ ފުލުހުން ކުރިއަށް ގެންދިޔަ "ވޯކް އެންޑް ޓޯކް" ހަރަކާތުގެ ތެރެއިން. ފޮޓޯ: ޕޮލިސް

ފުލުހުން ބުނީ މި ހަރަކާތުގެ ތެރެއިން ފުލުހުންގެ ވިޒިބިލިޓީ އިތުރުކުރުމާއި އެކި ސަރަހައްދުތަކަށް ޒިޔާރަތްކުރުމާއި ކުށްތަކުން ރައްކާތެރިކުރުވުމަށް ރައްޔިތުން ހޭލުންތެރިކޮށް މައުލޫމާތުދިނުމުގެ މަސައްކަތްތައް ކޮށްފައިވާ ކަމަށެވެ. އޭގެ އިތުރުން މި ހަރަކާތުގެ ތެރެއިން ސްކޭމްގެ މައްސަލަތަކުން ރައްކާތެރިކުރުމަށް މައުލޫމާތުދިނުމާ އަދި ކުށްތައް ހިނގާ ސަރަހައްދުތައް ދެނެގަނެ، ކުށްމަދު ކުރުމަށް ރައްޔިތުންނާ ގުޅިގެން ކުރެވިދާނެ ކަންކަން ދެނެގަތުމަކީ ވެސް ހަރަކާތް ކުރިއަަށް ގެންދިޔަ ބޭނުމެއް ކަމަށެވެ.

މުޅި ރާއްޖެ ހިމެނޭ ގޮތަށް، ފުލުހުން ގާއިމުވެފައިވާ ހުރިހާ ރަށެއްގައި އެއްވަގުތެއްގައި ކުރިއަށް ގެންދިޔަ މި ހަރަކާތުގައި ކޮމިޝަނަ އޮފް ޕޮލިސް އަލީ ޝުޖާއު، ޑެޕިއުޓީ ކޮމިޝަނަ އޮފް ޕޮލިސް އިސްމާއީލް ނަވީން އަދި އެހެނިހެން ރޭންކުތަކުގެ ފުލުހުންނާއި ރަށްރަށުގެ ޕޮލިސް ސްޓޭޝަންތަކާއި ޕޮލިސް ޕޯސްޓް އަދި ޕޮލިސް ޑެސްކުތަކުގައި މަސައްކަތްކުރާ ފުލުހުން ހިމެނޭ ގޮތަށް ގިނަ އަދަދެއްގެ ފުލުހުން ބައިވެރިވިއެވެ.