އެކި މައްސަލަތަކާ ގުޅިގެން މިހާތަނަށް 5000 ބިދޭސީން ޑީޕޯޓުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

"ހަފްތާ 52" ޕްރޮގްރާމުގައި މިނިސްޓަރު އިހުސާން ވިދާޅުވީ ބިދޭސީންގެ މައްސަލަ ހައްލު ކުރުމަށް މިދިޔަ އަހަރުގެ ނޮވެމްބަރު 17 އިން ފެށިގެން ކުރި މަސައްކަތުން މިހާތަނަށް 5000 ބިދޭސީން ޑީޕޯޓު ކުރެވިފައިވާ ކަމަށެވެ.

އަދި ރާއްޖޭގެ 138 ރަށެއްގައި ބިދޭސީންގެ ބަޔޯމެޓްރިކްސް ނެގުމުގެ މަސައްކަތް ހޯމްލޭންޑް މިނިސްޓްރީން ކުރަމުން އަންނަ ކަމަށް ވެސް ވިދާޅުވެފައިވެއެވެ. އެގޮތުން މިހާތަނަށް 10،000 އަށްވުރެ ގިނަ ބިދޭސީންގެ މައުލޫމާތު އެއްކޮށްފައިވާ ކަމަށާއި ރާއްޖޭގައި ދިރިއުޅޭ ހުރިހާ ބިދޭސީންގެ މައުލޫމާތު އަންނަ އަހަރުގެ އޭޕްރީލްގެ ނިޔަލަށް ނަގައި ނިންމޭނެ ކަމަށް ވެސް މިނިސްޓަރު ވިދާޅުވި އެވެ.

ބިދޭސީ އާބާދީގެ ތެރޭގައި ގިނައީ ގަވާއިދާ ހިލާފަށް، ސައްހަ ވިސާއެއް ނެތި ރާއްޖޭގައި އުޅެމުންދާ ބިދޭސީންނާއި އެކިއެކި ކުށްތަކަށް އަރައިގެންފައިވާ ބިދޭސީންނެވެ. އޭގެ ތެރޭގައި މަސްތުވާތަކެތީގެ ވިޔަފާރިއާއި ހަށި ވިއްކުމުގެ ވިޔަފާރި ކުރުން ހިމެނެއެވެ. 

ރާއްޖެއިން ފުރުވާލި ބިދޭސީންގެ ތެރޭގައި ކުށްތަކަށް އަރައިގަތް ބިދޭސީން ގިނަކަން ފާހަގަ ކުރެވެއެވެ.