ސަރުކާރުގެ ކުންފުނިތަކުގެ ކަންކަން ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ގާނޫނު އުވާލުމަށްފަހު ދައުލަތުގެ ކުންފުނިތަކާ ގުޅޭ އާ ގާނޫނެއް ހެދުމަށް ކަނޑައަޅައިފިއެވެ.

އަންނަ އަހަރު ރައްޔިތުންގެ މަޖިލީހުގެ ފުރަތަމަ ދައުރުގައި ދައުލަތުގެ ކުންފުނިތަކާ ގުޅޭ އާ ގާނޫނެއްގެ ބިލް މަޖިލީހަށް ފޮނުވަން ހަމަޖައްސައިފައިވާ ކަމަށް އަންނަ އަހަރަށް ލަފާކުރާ ދައުލަތުގެ ބަޖެޓް ރިޕޯޓުގައިވަނީ ފާހަގަކޮށްފައެވެ. ފިނޭންސް މިނިސްޓްރީން ބުނީ، އެއީ މާލީ އިދާރާތަކުގެ ލަފައާ އެކު ކުންފުނިތައް ހިންގުމަށް އެންމެ ބެސްޓް ޕްރެކްޓިސްތައް ހިމަނައިގެން އެކުލަވާލާ ގާނޫނެއް ކަމަށެވެ.

އެ ގާނޫނުގެ ތެރެއިން ސަރުކާރު ހިއްސާވާ ކުންފުނިތަކުގެ ގަވަނެންސް އޮނިގަނޑެއް ގާއިމްކޮށް އަދި އެސްއޯއީތަކުގެ މިލްކުވެރިކަމުގެ ސިޔާސަތުތައް ކަނޑައެޅުމުގެ އިތުރުން ހިންގުމާއި ބެލެހެއްޓުމުގެ މިންގަނޑުތައް ވެސް ހަމަޖައްސާނެއެވެ.

އެހެންކަމުން، ޕީސީބީގެ ގާނޫނު އުވާލައި، އެ ގާނޫނުގައި ހިމެނޭ މުހިންމު ބައިތައް ވެސް އެސްއޯއީތަކާ ގުޅޭ ގާނޫނަށް އިތުރުކުރާނެ ކަމަށް ފިނޭންސް މިނިސްޓްރީން ފާހަގަކުރިއެވެ. އަދި ޕީސީބީ އުވާލުމަށްފަހު ކުންފުނިތަކާ ގުޅޭ ހުރިހާ ކަންކަން ބަލަހައްޓާނީ ފިނޭންސް މިނިސްޓްރީގެ ދަށުންނެވެ.

ފިނޭންސް މިނިސްޓްރީން ބުނީ، ކުންފުނިތަކުގެ ހިންގުން ހަރުދަނާކޮށް އިސްރާފުކުރުން ހުއްޓުވުމަށް ގަވާއިދުން އޮޑިޓް ކުރުމާއި މާލީ ކަންކަން ބެލެހެއްޓުމާއި މުވައްޒަފުން ބޭނުންވާ ވަރަށް ވުރެ އިތުރަށް ނެގުން ހުއްޓުވުމަށްޓަކައި މުވައްޒަފުން ނެގުމުގެ އާ އުސޫލެއް އެކުލަވާލާނެ ކަމަށެވެ.

ސަރުކާރު ހިއްސާވާ 30 ކުންފުންޏެއް މިވަގުތު އޮތް ނަމަވެސް، އޭގެ ތެރެއިން ފައިދާ ލިބެނީ 40 ޕަސެންޓު ކުންފުނިންނެވެ. އަދި ކޯޕަރޭޓް ގަވަނަންސްގެ މިންގަނޑުތަކަށް ބަލައިގެން ހިންގަނީ އެތަނުން އެންމެ ދިހަ ވަރަކަށް ކުންފުންޏެވެ.