މަގުމަތީގައި ވަންނާނެ ތަނެއް ނެތިގެން ސަލާން ޖަހައި އަދި މަސްތުވާތަކެތީގެ ޝިކާރައަކަށްވެފައިވާ މީހުން ބަންދު ކޮށްގެން ފަރުވާ ދިނުމަށް ފެށި އޮޕަރޭޝަނުގައި މިހާތަނަށް 47 މީހުން ގެންގޮސްފައިވާ ކަމަށް ހޯމްލޭންޑް ސެކިއުރިޓީ މިނިސްޓްރީން ބުނެފިއެވެ.

އެފަދަ މީހުން ދެނެގަނެ، އެ މީހުންނަށް ފަރުވާ ދިނުމުގެ ހާއްސަ ޕްރޮގްރާމް ފެށުމަށް މީހުން ގެންދަން ފެށީ މިދިޔަ މަހުގެ 22ގަ އެވެ.

މިއީ މުއްދަތެއް ނެތް ގޮތަށް ގެންދާ އޮޕަރޭޝަނެއް ކަމަށް ނޭޝަނަލް ޑްރަގް އެޖެންސީ (އެންޑީއޭ) ގެ ޗެއާޕާސަން ލުބުނާ މުހައްމަދު ޒާހިރު ހުސެއިން ވަނީ ވިދާޅުވެފައެވެ.

"މި އޮޕަރޭޝަންގެ ދަށުން، މަގުމަތީ ސަލާން ޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މީހުންނާއި މަސްތުވާތަކެތި ބޭނުންކުރާ މީހުން ބަންދުކޮށް އެ މީހުންނަށް ބޭނުންވާ ފަރުވާ ދޭނެ،" އޭނާ ފާހަގަކުރިއެވެ.

އެންޑީއޭގެ ޗެއާޕާސަން ލުބުނާ ވިދާޅުވީ، އެ އޭޖެންސީއިން ފަރުވާދޭ ނިޒާމު ހަރުދަނާކޮށް ރިލެޕްސް ޕްރިވެންޝަން އަދި ރީއިންޓެގްރޭޝަނާއި އާފްޓާކެއާގެ އިތުރުން ޑްރަގް ޕްރިވެންޝަން މަސައްކަތްތައް ކުރުމަށް ހާއްސަ ސަމާލުކަމެއް ދެއްވާނެކަމަށެވެ.

އެންޑީއޭއިން ފޯރުކޮށްދެނީ ރެސިޑެންޝަލް އާއި ނޮން ރެސިޑެންޝަލް ފަރުވާއެވެ.  އޭގެ ތެރެއިން ރެސިޑެންޝަލް ފަރުވާގެ ތެރޭގައި ހިމެނެނީ ކ. ހިންމަފުށީގައި ހުންނަ ތެރަޕިއުޓިކް ކޮމިއުނިޓީ ރިހެބިލިޓޭޝަން ސެންޓަރާއި ރެސިޑެންޝަލް ޑީޓޮކްސް އާއި ސެމީ ރެސިޑެންޝަލް ފެސިލިޓީ އާއި ރިމާންޑް ސެންޓަރެކެވެ. އައްޑު އާއި ފުވައްމުލަކާއި ގދ. ތިނަދޫގައި ވެސް ޑީޓޮކްސް ފެސިލިޓީއެއް ޤާއިމްކޮށްފައި ހުރެއެވެ.

މުޅި ރާއްޖެއަށް ފަރުވާ ދިނުމަށް ހަދާފައިވާ ޑްރަގް ފެސިލިޓީތަކުގެ ކެޕޭސިޓީއަކީ އެންމެ 300 އެނދެވެ. މިއީ މަސްތުވާތަކެތީގެ ވަކިތަކުގައި ޖެހިފައިވާ މީހުންގެ އަދަދަށް ބަލާނަމަ ވަރަށް ކުޑަ ކެޕޭސިޓީއެކެވެ.